Ra’iisal wasaare Kheyre oo ka qeybgalay munaasabad looga hadlayay taakuleynta ciidamada
Isniin, October, 09, 2017 (HOL)- Ra’iisul Wasaaraha Xukuumadda Federaalka
Soomaaliya Xassan Cali Khayre ayaa xalayka qeyb galay munaasabad lagu soo
bandhigayay wixii u qabsoomay Guddiga Taakuleynta Ciidanka qalabka sida ee
dhawaan uu magacaabay Madaxweynaha.
Guddiga ayaa sheegay in ay diyaariyeen dariiq ay shacabka Soomaaliyeed ku
soo gaarsiin karaan kaalmada ay ugu tala galeen in lagu caawiyo ciidankooda.
Ra’iisul Wasaare Khayre ayaa xusay muhiimadda ay Ciidamadu u leeyihiin dal
kasta iyo sida Soomaaliya ay maanta ugu baahan tahay soo celinta karaamadii ay
lahaayeen ciidankeenu.
Waxaa uu baaq ku aaddan inay ciidamadooda taageeraan u diray bulshada
Soomaaliyeed, ay garab istaagaan hawlaha lagu horumarinayo dhismaha
dawladnimada.
Sidoo kale Khayre ayaa balan qaaday in xukuumaddu ay 20 kun dollar siin
doonto gudiga taakuleynta Ciidamada si loo dar-dargeliyo hawlaha gudiga.
Munaasabadan ayaa waxaa sidoo kale ka soo qeyb galay masuuliyiin ka tirsan
labada gole ee dawladda, maamulka gobolka Banaadir, saraakiil iyo siyaasiyiin.
C/raxmaan Diini, Hiiraan Online
[email protected]