Ra’iisal wasaare Kheyre’’ Xukuumadda federaalka waxaa ka go’an in ay la shaqeyso dowlad gobolleedyada
Talaado, October, 31, 2017 (HOL) - Ra’iisul wasaaraha xukuumadda federaalka
Soomaaliya Xassan Cali Khayre ayaa sheegay inuu soo dhaweynayo bilaha soo socda
sidii looga wada shaqeyn lahaa sidii dalka loo xoreyn lahaa, kadib khudbad uu
xalay ka jeediyay shirka dowladda dhexe iyo dowlad goboleedyada.
Ra’iisal wasaaraha ayaa sheegay in xukuumadda federaalka ay ka go’an tahay
in ay la shaqeyso xubnaha kale ee wasiirada dowlad gobolleedyada, sidoo kalena
la dardar geliyo shaqooyinka kale.
Wuxuu sheegay in waajibaadka qof walba hor yaala tahay oo kaliya sida uu
hadalka u dhigay in lala wada dagaalamo Al-shabaab.
“Waxaan soo dhaweynayaa fikirka ah
bilaha soo socda in kuligeen aan ka wada shaqeyno sidii loo xoreyn lahaa dalka,
sida uu ku baaqay madaxweynaha, xukuumadda waxaa ka go’an in ay la shaqeyso
xubnaha kale ee wasiirada dowlad goboleedyada” ayuu yiri Khayre.
Ra’iisul wasaaraha xukuumadda federaalka Soomaaliya ayaa sidoo kale sheegay dowladnimada
in laga balaarin doono Muqdisho, lana gaarsiin doono dhammaan gobolada dalka.
Shirka dowladda dhexe iyo dowlad goboleedyada uga socda magaalada Muqdisho
ayaa waxaa la filayaa in lagu dhameeyo mad madowga yar yar ee ka dhexjira labada
dhinac iyo qodobo kale oo ay ka mid yihiin xoojinta ammaanka dalka.
C/raxmaan Diini, Hiiraan Online
[email protected]
