Isniin, October, 30, 2017 (HOL) – Danjiraha gaarka ah Midowga Afrika (SRCC)
ee Soomaaliya, Ambassador Francisco Madeira, ayaa si adag u cambaareeyay weerarkii
Sabtidii ina dhaaftay ka dhacay Hotelka Naasa-hablood 2 ee magaalada Muqdisho.
Mr. Madeira ayaa marka hore wuxuu tacsi u diray Ehelada dadkii lagu laayay
weerarka, isaga oo sidoo kale kuwii dhaawacmay ugu duceeyay in ay helaan
caafimaad deg deg ah.
Wuxuu sheegay in uu ka murugoonayo ficilada is daba jooga ah ee lagu
beegsanayo shacabka, kadib Qaraxii 14-kii bishan ka dhacay Isgoyska Zoobe ee
magaalada Muqdisho, kaasi oo ahaa mid musiibo Qaran ah.
Ambassador Francisco ayaa afka ku balaariyay in Al-shabaab ay si ula kac ah
u bartilmaameed-sanayaan oo ay nolosha u diideen dadka rayidka ah ee aan waxba
galabsan iyo burburinta ilaha noloshooda.
Wuxuu yiri “Tallaabada ugu dambeysa ee fulaynimada ah waxay u tusineysaa
ficilada xun xun ee Al-shabaab oo ay ku baabi’inayaan ganacsiyada, ayna
hortagaan yihiin horumarka ay sameeyeen dadka Soomaaliyeed ee ka shaqeynaya
xasilinta dalkooda.”
Ugu dambeyntii Danjire Madeira ayaa ku celiyay in Midowga Afrika iyo AMISOM
ay diyaar u yihiin in ay la shaqeeyaan dadka Soomaaliyeed iyo xukuumaddooda si
Shabaab looga saaro degaanada iyo degmooyinka ay dalka kaga sugan yihiin.
Weerarkii Naasa-hablood 2 oo masuuliyadiisa ay sheegteen Shabaab ayaa waxaa
ku dhimatay dad gaaraya 27 qof, halka ay ku dhaawacmen tiro intaas ka badan,
weerarkaasi oo ay soo qaadeen Shan Dagaalame oo Shabaab ka tirsan ayaa waxaa
gacanta lagu dhigay saddex ka mid ah raggaasi, sida ay sheegtay dowladda
federaalka.
C/raxmaan Diini, Hiiraan Online
[email protected]
