Axad, October, 29, 2017 (HOL) – Warar soo baxaya ayaa sheegaya in ay jirto saameyn uu ku yeeshay weerarkii shalay lagu
qaaday Hotelka Naasa Hablood ee magaalada Muqdisho shirkii madaxda Qaranka ee
lagu waday in uu maanta ka furmo magaalada Muqdisho.
Shirkan oo ay yeelan lahaayeen mas’uuliyiinta sare ee
dowladda federaalka iyo madaxda maamul gobolleedyada dalka ka jira, ayaa mar
kale dib u dhac ku yimid madaama qorshuhu ahaa in uu furmo saacadihii hore ee
maanta.
Ilo kala duwan oo aan xiriir la sameynay ayaa inoo
sheegay in mas’uuliyiintii ka qeybgali laheyd shirkan qaarkood mashquul ku
yihiin ka qeybgalka Aaska dadkii ku dhintay qaraxyadii shalay ka dhacay
caasimada oo ay ka mid ahaayeen siyaasiyiin iyo shaqsiyaad xilal ka hayay
dowladda iyo maamul gobolleedyada qaarkood.
Dadka qaraxii shalay ku dhintay waxaa ka mid ahaa
wasiirkii arrimaha gudaha maamulka Koonfur Galbeed Madoobe Nuunoow Maxamed oo
dhinaca kalana ahaa siyaasi Soomaaliyeed oo siweyn loo garanayo, waxaana uu
Madoobe ka mid ahaa wafdigii Shariif Xassan Sheekh Aadan ee u yimid ka qeybgalka
shirka Muqdisho ka furmi lahaa maanta.
Madaxweyne Shariif Xassan ayaa la sheegay in uu ku
mashquulsan yahay sagootinta meydka marxuum Madoobe Nuunoow oo loo qaadayo
magaalada Baydhabo ee xarunta gobolka Baay.
Ilaa saacadaha danbe ee maanta ayaa la filayaa in uu
shirku si rasmi ah u furmo halka wararka kalana sheegayaan suurtagalnimada in ilaa maalinta berri ah uu
dib u dhaco.
Waxaa jira kulamo hoosaadyo u soconaya mas'uuliyiinta dowladda federaalka iyo madaxweyne gobolleedyada ku sugan caasimada, kuwaa oo la sheegay in looga arrinayo furitaanka shirka.
C/raxmaan Diini, Hiiraan Online
[email protected]
