Saraakiisha Amniga oo sheegay in la soo afjaray Howlgalkii hotelka Naasa Hablood
Axad, October, 29, 2017 (HOL) – Saraakiisha hay’addaha
Amniga Soomaaliya ayaa sheegay in ay soo afjareen weerarkii hoteelka Naasa
Hablood 2 ee magaalada Muqdisho oo dabley hubeysan ay shalay gudaha u galeen.
Tirada dhimashada ayaa la sheegayaa in ay ka badan tahay 20
qof halka dhaawacuna uu ka badan yahay 30 qof.
Inta la xaqiijiyay dadka dhintay waxaa ku jira mas'uul ka
tirsan guddiga taakuleynta ciidamada islamarkaana ahaan jiray xildhibaan ka
tirsan baarlamaanka iyo wasiir ka tirsan maamulka dowlad goboleedka Koonfur
Galbeed.
Madaxweynaha Soomaaliya Maxamed Cabdullaahi Farmaajo ayaa
xalay ka tacsiyeeyay dadkii weerarkaasi lagu dilay, waxa uuna sheegay in
weerarada Al-Shabaab aysan marnaba niyad jebin doonin dowladdiisa.
Xarakada Al-Shabaab ayaa sheegatay mas'uuliyadda weerarkani,
waxa ayna sheegtay in bartilmaameedkoodu ahaa hoteelka Naasa Hablood 2 oo ay
sheegeen in ay deganaayeen saraakiil sare oo ka tirsan dowladda Soomaaliya.
Qaraxyadani ayaa ku soo beegmaya todobaad kaddib qaraxii
waynaa ee 14-ka bishan ka dhacay isgoyska Soobe ee isla magaalada Muqdisho,
kaasi oo ay ku dhinteen in ka badan 300 oo qof.
C/raxmaan Diini, Hiiraan Online
[email protected]
