Shan qof oo loo soo qabtay koox dhalinaro ah oo soo weerartay guriga musharaxa xisbiga WADANI
Sabti, Octobar,28, 2017 (HOL)- Ciidamada
Amniga Somaliland ayaa gacanta ku soo dhigay koox dhallinyaro ah oo guriga
musharaxa xisbiga mucaaradka ah ee WADANI xalay gurigiisa shiid iyo dhagaxaan ku
weerartay.
Sidoo kale, dhacdadaasi waxa ka hadlay gudoomiyaha ku meelgaadhka ah
ee xisbiga WADANI C/qaadir Jirde oo sheegay in kooxdii xalay guriga musharaxa
xisbiga shiiday qaarkood ay waalidkooda u yimid oo ay raaligalin ka
bixiyeen, islamarkaana ay raaligalintaasi ka aqbaleen.
“koox dhalinyaro ah ayaa xalay guriga musharaxa xisbiga WADANI
C/raxmaan Cirro shiid iyo dhagaxaan la dhacay waxay isku dayeen inay xoog ku
soo galaan guriga, waxaase ka hor tagay ciidankii ilaaladda ka ahaa, waxaanay
dhagaxaantii ay shiidayeen ku dhaawaceen askartii ilaaladda ahayd, wuxuuna
hayaa khasaare fudud oo ay ku doonayeen inay guriga koox ku soo galaan oo ay
dadka dhibaateeyaan”ayuu yiri Jirde gudoomiyaha ku meel gaadhka ah ee
xisbigaasi.
Waxanu intaasi ku daray “dadki loo aanaynayey falkaasi waalidkooddii
ayaa noo yimid oo naga raali galiyey waana ka aqbalay, laakiin arrintaasi
waxaanu u aragnay arrin la soo abaabulay
waxaana u haysanaa inay ka dambeeyeen dadkii aanu tartamaynay”.
C/qaadir Jirde waxa uu taageerayaashiisii ugu baaqay inay ka ficil
qaadaan falkaasi,isla markaana ay nabadda ilaaliyaan.
Sidoo kale, taliyaha Ciidanka Booliska C/laahi Fadal Iimaan ayaa
sheegay in kooxdii guriga musharaxa xisbiga WADANI weerartay loo qabtay shan
qof oo falkaasi ku jiray oo qaarkood waalidkood soo qabteen oo ay gacanta usoo
galiyeen booliska.
“kooxo dhalinyaro ah ayaa weerartay guriga musharaxa xisbiga WADANI
way shiideen ciidanka booliska ayaa markii dhacdadaasi soo gaadheen wuxu galay
hawlgal balaadhan, waxay gacant ku soo dhigeen afar qof oo dadkii falkaasi
gaystay iyo laba baabuur, waxa kale oo waalidkood keenay hal wiil oo booliska
loo soo dhiibay,waan ku hambalyeynayaa waalidkaasi noo soo gudbiyey wiilkoodii
kooxdaasi ku jiray, waana dhacdo ku cusub oo aan ciidanku u dul qaadanayn, waxa
la hayaa shan qof iyo laba baabuur dhamaantood waxa la hor keeni doona
sharciga”ayuu yidhi taliyaha booliska Fadal.
Sidoo kale waxa uu sheegay in dhalinyaro xisbiga WADANI ah oo
weerartay xafiisyo xisbiga kulmiye ah loo qabtay hal qof, kuwaas oo uu sheegay
inay ka daba tagi doonaan oo dhalinyarta falalka noocaas oo kale ah isku dayaan
ay gacan bir ah ku qaban doonaan.
Taliyaha Booliska Somaliland Fadal ayaa sheegay in dhalinyaro kooxo ah
oo inta badan booliska iska hor iman jiray ama
habeenkii rabshado abaabuli jiray ay hadda ku kala biireen
taageerayaasha xisbiyadda, waxaanu ugu baaqay in xisbiyaddu dhallinyarta
noocaas ah iska fogaan oo aanay ku dhex gaban xisbiyadda.
Dhinaca kale, musharaxa xisbiga
muxaafadka ah ee KULMIYE Muuse Biixi ayaa isna arintaasi cambaareeyey,isla
markaana ku tilmaamay madownimo aan la aqbali Karin, isagoo dadkii arrintaasi
sameeyeyna ugu baaqay in sharciga la horkeeno.
Barkhad-ladiif M. Cumar,
Hiiraan Online
[email protected]
Hargeysa, Somaliland.