Sabti, October, 28, 2017 (HOL) - Sida horeyba loo sheegay maanta ayaa lagu wadaa in magaalada Muqdisho ka
furmo shirka dowladda dhexe iyo maamulka gobolleedyada qeybta ka ah dowladda federaalka.
Shirka ayaa waxaa ku baaqay madaxweynaha dowladda Soomaaliya
Maxamed Cabdullaahi Farmaajo kaddib markii uu soo ifbaxay khilaaf siyaasadeed
adag soo kala dhaxgalay dowladda federaalka iyo madaxda dowlad gobolleedyada.
Shalay waxaa Muqdisho yimid madaxweynayaasha dowlad
gobolleedyada Hirshabeelle iyo Koonfur Galbeed, waxaana maanta la sugayaa
madaxweynayaasha maamulada Puntland, Jubbaland iyo Galmudug.
Ra’iisal wasaaraha xukuumadda Soomaaliya Xassan Cali Kheyre
oo dhawaan Jowhar uga qeyb galay munaasabadii caleemo saarka madaxweynaha
Hirshabeelle ayaa halkaa ka sheegay in uu jiro khilaaf u dhaxeeya labada dhinac
laakiin lagu xalin doono sida uu hadalka ku dhigay shirka loo balansan yahay ee
maanta ka furmaya Muqdisho.
Khilaafka ugu xoogan ee labada dhinac ayaa soo shaac baxay
kaddib markii inta badan madaxda dowlad gobolleedyada taageero u muujiyeen
xulufada Sacuudiga iyo Imaaraadka ee la xiriira khilaafka Khaliijka, iyaga oo
ka hor yimid go’aankii ay dowladda ka qaadatay muranka iyo xasarada siyaasadeed
ee ka dhax oogan wadamada Carabta.
C/raxmaan Diini, Hiiraan Online
[email protected]
