Jimco, October, 27, 2017 (HOL) - Iyadoo loo balansan yahay 28ka bishan oo
beegan maalinta berri ah in uu Muqdisho shir wadatashi ah oo u dhaxeeya
dowladda federaalka iyo maamulada dalka ka jira, ayaa waxaa Muqdisho soo gaaray
qaar ka mid ah madaxweynayaasha dowlad gobolleedyada dalka ka dhisan.
Madaxweynayaasha Hirshabeelle iyo Koonfur Galbeed Maxamed Cabdi Waare iyo
Shariif Xassan Sheekh Aadan ayaa maanta yimid magaalada Muqdisho, waxaana sidoo
kale maalinta berri ah la filayaa in ay caasimada soo gaaraan madaxweynayaasha
maamulada Puntland, Jubbaland iyo Galmudug.
Madaxweyne Farmaajo ayaa shirkan ku baaqay kaddib khilaaf siyaasadeed oo soo
kala dhaxgalay dowladda dhexe iyo madaxda dowlad gobolleedyada oo shir u gaar
ah ku yeeshay magaalada Kismaayo dhawaan.
Shirkaa ayeey uga dhawaaqeen madaxweynayaasha dowlad gobolleedyada Isbaheysi
ay ku mideysan yihiin waxaana guddoomiye ka ah madaxweynaha Puntland Cabdiwali
Maxamed Cali Gaas.
Inkastoo maalinta berri ah la filayo in uu shirkani furmo, haddana warar soo
baxaya ayaa sheegaya in uu dib u dhaci karo ilaa 29ka bishan oo ku beegan Axada nagu
soo foolka leh.
C/raxmaan
Diini, Hiiraan Online
[email protected]
