Jimco, Octobar,27, 2017 (HOL)- Madaxweyne
Axmed Siilaanyo ayaa xilkii ka qaaday Badhasaabkii gobolka Maroodi jeex Mustafe
Cabdi Ciise (Mustafe Shiine) oo muddo bil ka yar xilkan loo soo wareejiyey kaddib markii laga soo bedelay gobolka Awdal oo uu madaxweyne ku xigeenku shaqadda
ka joojiyey.
Madaxweyne Siilaanyo ayaa
markiiba xilkaasi u magacaabay mas'uul kale oo magaciisa la yidhaahdo Mire
Maxamed oo madaxweynuhu amray in uu xilkaasi ku wareejiyo.
“Madaxweynaha Somaliland, Mudane
Axmed Maxamed Silaanyo, waxa uu wareegto madaxweyne oo summadeedu tahay
JSL/M/XILQ/249/1-5169/102017 uu xilka qaadis iyo magacaabid ku sameeyey Guddoomiyaha Gobolka Maroodi-jeex.”ayaa lagu
yidhi qoraal madaxweynaha xafiiskiisa ka soo baxay.
“Waxaan aad kuugu mahadinayaa
muddadii aynu wada shaqaynaynay. Xilalka Qaranka ayey dabcigeed tahay in ay
meerto noqoto oo kolba cid hanan karta loo dhiibo.Sidaa darteed, waxaan gartay
in aan kaa qaado xilka Guddoomiyaha Gobolka Maroodi-jeex ee Somaliland.”ayuu
madaxweynuhu qoraalkiisa raaciyey.
Dhinaca kale, Badhasaabka gobolka
Maroodi jeex Mustafe Shiine ee xilka laga qaaday ayaa ka hadlay xilkaasi laga
qaaday waxaanu ku dooday in xil ka qaadistu ay tahay mid dastuuri oo uu
madaxweynuhu u madax banaan yahay inuu xil masuul u magacaabo iyo in laga
qaaddo.
“Waxaan baraha bulshada ku arkay
in xilkii la iga qaaday, waana arrin dastuuri ah in madaxweynuhu marka uu doono
xilka ka qaado marka uu doonana xil u magacaabo, waana u mahad celinayaa
madaxweynaha xilalkaasi kala duwan ee uu ii magacaabay”ayuu yidhi Mustafe
Shiine oo ka dareen celinayey xilkaasi laga qaaday.
Mustafe Shiine wuxuu sheegay inuu
ka fikirayo inuu iska nasto oo aanu xisbiba ku biirin iyo inuu xisbiyada ku kala
biiro.
Inkasta oo aan la sheegin sababta
xilka looga qaaday, haseyeeshee dadka siyaasadda odorosaa ayaa arrintaasi ku
tilmaamay in loo tuhmay inuu Mustafe shiine xilkaasi iska casilayo sidaas
darteed madaxweynuhu kaga horeeyey inta aanu xilka iska casilin, iyadoo
maalmihii u dambeeyey wararku sheegayaan in masuuliyiin xilal kala duwan ka
haya xukuumadda madaxweyne siilaano la filayo inay xilalka ay hayaan iska
casilaan ka dibna ay ku biiraan xisbiga mucaaradka ah ee WADANI si ay u sii
xoojiyaan,isla markaana xukuumadda wakhtigeeddu dhamaaday aanay la sugin inay
la dhamaystaan balse is casilaan, taasina ay keentay sababta gudoomiyaha
gobolka Maroodi jeex xilka looga qaaday inay daba socoto dadka la tuhmayo inay
damacsan yihiin inay is casilaan, inkastoo Mustafe Shiine sheegay in aanu ku
tallo jirin in uu is casilo.
Barkhad-ladiif M. Cumar,
Hiiraan Online
[email protected]
Hargeysa, Somaliland.
