Jimco, October, 27, 2017 (HOL) -Dowladda Soomaaliya ayaa
waxba kama jiraan ku sheegtay eedeymo inta badan loo jeediyo oo ah in aysan
bixin mishaaradka kala duwan ee shaqaalaha dowladda iyo ciidamada oo marar
badan oo hore arrintan cabasho ka keenay.
Wasiirka wasaarada maaliyada xukuumadda Soomaaliya
Cabdiraxmaan Ducaale Beylle ayaa sheegay in si joogta ah loo bixiyo mishaarka
nooc kasta oo uu yahayba, isaga oo meesha ka saaray wararka sheegaya in dowladda
aysan mishaar bixin.
‘’Waxaa nasiib wanaag ah qof maanta mishaar uu ka maqan
yahay ma jiro, bishii 10aad ayaan ku jirnaa, qof walba marka ay bisha dhamaato
mishaarkiisa waa uu hellaa, qof maanta
wax nagu leh oo mishaar dowladda ku sheegan kara ma jiro haddii ay jiraan dad
noocaas ahna aad ayeey u yar yihiin ayuu yiri’ wasiirka wasaarada maaliyada.
Dhinaca kale wasiirka ayaa ka hor yimid dhaqan sida uu sheegay isaga ka horeeyay oo ah in bisha December aan
wax mishaar ah la bixin, arintaa oo uu ku tilmaamay caado xun oo aan sax aheyn.
‘’Annigu dalkan ma joogin waxaa leygu
yiri bisha December mishaar lama qaato, Sabab ? markii aan weydiiyayna Mayee
lama qaato ayaa la Igu yiri, Waa caado qalad ah, haddii xitaa fasax lagu jiro sow
qofkii uma baahna nolal, sow Gurigiisa wax laguma kariyo, sow Leyrkii lagama
doonayo, meel ay arintaa ka timid garan maayo,
aduunyada bisha aad shaqeyso lacag baad leedahay, xitaa haddii aadan shaqeyn oo aad shaqaale tahay
xuquuq ayaa jirta’’ ayuu yiri wasiirka.
Wasiir Beyle ayaa ugu danbeyntii rajo wanaagsan ka muujiyay in Soomaaliya
laga dhaafo sida uu hadalka u dhigay deymaha laga leeyahay.
C/raxmaan
Diini, Hiiraan Online
[email protected]
