Khamiis, October, 26, 2017 (HOL) – Shacabka
ku dhaqan dalka Kenya ayaa maanta oo Khamiis ah u dareeray goobaha cod bixinta
ee doorashada ku celiska ah ee horay u go’aamisay Maxkamadda sare ee dalka
Kenya.
Ammaanka ayaa si aad ah loo adkeeyay, waxaa ciidamo la geeyay goobaha ay ka
socoto cod bixinta oo ay dadka safaf dhaadheer ugu jiraan.
Goobaha cod bixinta ayaa saaka abaarihii 6-dii subaxnimo la furay, waxaana
cod bixinta meelaha qaar ku bilaabatay si degan.
Balse deegaanada ay mucaaradka ku xooggan yihiin ayaa waxaa ka bilowday
rabshado, halka meelaha qaar aanay dadka guryahooda ka soo bixin.
Madaxweyne Uhuru Kenyatta ayaa ugu baaqay dadka Kenya inay codeeyaan, isla
markaana ammaanka la ilaaliyo.
Hoggaamiyaha mucaaradka Raila Odinga ayaa qaadacay doorashadan ku celiska
ah, isagoo ugu baaqay taageerayaashiisa in aysan codeyn.
Horaantii bishii September ayay aheyd markii Maxkamadda sare ee dalka Kenya
ay laashay natiijadii doorashadii 8 August uu ku guuleystay Uhuru Kenyatta,
waxaana Maxkamaddu ku amartay in la qabto doorasho ku celis ah.
C/raxmaan Diini, Hiiraan Online
[email protected]
