Arbaco, October, 25, 2017 (HOL) – Howlgalka midowga
Africa AMISOM ayaa ka hadlay weerar saacadihii hore ee maanta ka dhacay
deegaanka Lafoole, gaar ahaan waddada xiriirisa Muqdisho iyo Afgooye, waxaana jira
eedeymo soo baxaya oo ah in AMISOM halkaa ku lahaayeen dad rayid ah.
Afhayeen u hadlay ciidamada AMISOM oo lagu magacaabo Wilson
Rono ayaa sheegay in in qarax iyo dagaal toos ah ay la kulmeen ciidamada
AMISOM, laakiin wuxuu sheegay in uusan xaqiijin karin khasaaraha dhabta ah ee
ka dhashay weerarkaasi.
“Kolonyo ciidamadeena oo marayay meel u dhow degmada Afgooye ayaa waxay la
kulmeen qarax iyo dagaal toos ah, iyadoo ciidamada ay sameeyeen iska caabin,
lama xaqiijin karo khasaaraha ka dhashay weerarka, dib ayaan ka soo sheegi
doonnaa macluumaadka saxda ah”
Goobjogayaal ayaa warbaahinta u sheegay in qaraxa kaddib ciidamada AMISOM si
bareer ah u toogteen dad rayid ah.
Nin magaciisa ku sheegay Mustaf Cabdi Axmed ayaa warbaahinta u sheegay in
ciidamada AMISOM toogasho ku dileen Aabihii oo shaqo ku sii socday.
Ciidamada ayaa sidoo kale la sheegay in ay dileen Macalin ka tirsanaa dugsi
lagu magacaabo Alfurqaan oo ku yaala deegaanka Jaamacadda Beeraha ee gobolka
Shabeellaha Hoose.
C/raxmaan Diini, Hiiraan Online
[email protected]