Talaado, October, 24, 2017 (HOL) –
Kulan ballaaran oo ay soo qaban qaabisay Safaaradda Soomaaliya ee Koonfur
Africa laguna qabtay xaruta Safaarada looga hadlay Ganacsiga Soomalida halkaa ku dhaqan iyo dhibaatooyinka ay wajahayaan.
Waxaa kulanka si gaar ah diirada loogu saaray sidii looga hortagi lahaa
dhibaatooyinka Amni xumo ee soo wajahaya ganacsatada Soomaaliyeed iyo sidii dabagal loogu sameyn lahaa weerarada
loo geysto Soomaalida.
Ganacsatada kulanka ka qeybgashay ayaa sheegay in uu jiro hoos u dhac ku
yimid ganacsiga Soomaalida ay ku lahaayeen Tuulooyinka ah, sidoo kale waxaa ay
xuseen in barakicin xoogan lagu haayo goobaha ganacsiga Soomaalida,
kaddib markii goobaha ganacsiga Soomaalida laga iibiyay ganacsato Ajaanib ah, taasoo keentay in
Soomaalida laga saaro suuqyada ganacsiga ee dalkaan Koofur Afrika oo hore ay si
weyn uga dhax muuqdeen.
Ka soo qeybgalayaasha shirka qaar ka mid ah oo hadlay waxaa ay sheegeen in
dhibaatooyinka soo cusboonaday qaarkood ay sababeen caqabado heysta
milkiilayaasha goobaha ganacsiga Soomaalida ee ku yaala deegaanada tuulooyinka
ah, waxaana caqabadahaasi ay isugu jiraan kuwa la xariira arrimo amni iyo qaar
kale oo ka timid shaqaalo la’aan ku dhacday goobaha ganacsi oo ay dhalinyaradii
ka shaqeyn laheyd qaarna ay sharciyadii ku dhiban yihiin kadibna dalkii isaga
laabtay ama u tahriibay dalal kale ee caalamka.
Danjire Jamaal Maxamed Barrow oo ah
safiirka dowladd Soomaaliya ee Koonfur Africa oo kulanka ka hadlay ayaa sheegay
ayaa u balan qaaday ganacsatada wax ka qabashada dhibaatooyinka ay wajahayaan
islamarkaana ay safaaradda diyaarisay qorshe sanadka 2018 isbadal weyn lagu
sameeynayo.
“Safaarada waxaa ay diyaarisay qorshe cusub oo lagu howlgalayo sanadka 2018
ka haduu Alle idmo, waxaan noo diyaar ah in wado walba aan u marno sidii aan ku
badbaadin laheyn hantida iyo nafta ganacsatada Soomaalida islamarkaana aan
helno xaquuqda ay leeyihiin ganacsatada Soomaalida, lakiin la’aantiin ma shaqeyn
karno waxaa loo baahan yahay in aad nala shaqeysaan”ayuu yiri Danjire Jamaal
Barrow.
C/raxmaan Diini, Hiiraan Online
[email protected]