Isniin, October, 23, 2017 (HOL) - Madaxweynaha dowladda Soomaaliya oo
socdaal ku maraya qaar ka mid ah wadamada gobolka ayaa gaaray magaalada Addis
Ababa ee dalka Itoobiya oo ka mid ah dalalka ay ciidamada ka joogaan
Soomaaliya.
Madaxweynaha iyo wafdigii la socday waxaa garoonka diyaaradaha Addis Ababa
ku soo dhaweeyay mas’uuliyiin uu horkacayay wasiirka Arrimaha dibadda dalka
Itoobiya Workneh Gebeyehu.
Madaxweyne Farmaajo oo la hadlay warbaahinta ayaa sheegay in safarkiisa uu
salka ku hayo sidii loo dar-dar gelin lahaa dagaalka ka dhanka ah Al-shabaab
isla markaasna loo midayn lahaa qorshayaasha wadamada geeska Africa ee ay ku wajahaayaan
ka hor-tagga khatarta argagixisada.
Waxaa saacadaha soo socda lagu wadaa in uu dhaco kulan gaar ah oo dhaxmari
doona madaxweynaha iyo raiisul wasaaraha
Itoobiya Hailemariam Desalegn iyadoona ay si qoto dheer uga hadli doonaan
xiriirka iskaashiga ee labada dal gaar ahaan dhinacayda la xiriira dagaalka ka
dhanka ah Al-shabaab.
Madaxweynaha ayaa socdalalkiisa Addis Ababa kaddib la filayaa in uu uga sii
gudbo dalka Jabuuti, isaga oo kulamo la qaadan doona mas’uuliyiinta sare ee
dalkaasi Jabuuti.
C/raxmaan Diini, Hiiraan Online
[email protected]