Ra’iisal wasaare Kheyre oo khubadiisii Jowhar ku soo qaaday khilaafka DF iyo maamul gobolleedyada
Isniin, October, 23, 2017 (HOL) - Ra’iisal wasaaraha xukuumadda Soomaaliya
Xassan Cali Kheyre oo magaalada Jowhar uga qeybgalay munaasabada caleemo saarka
madaxweynaha maamulka Hirshabeelle Maxamed Cabdi Waare ayaa soo hadal qaaday
khilaafka DF iyo maamul gobolleedyada.
Ra’iisal wasaaraha ayaa qiray in uu jiro wax xooggaa kala aragti duwanaasho
siyaasadeed oo u dhaxeysa DF iyo maamulada dalka ka jira, isaga oo sheegay in
xukuumadda federaalku diyaar u tahay in la dhameeyo tabashada ay qabaan
maamulada dalka ka dhisan.
Waxaa uu sheegay in marnaba dowladda qorshaheedu aheyn in la dumiyo nidaamka
federaalka, laakiin taa badalkeeda dowladdu diyaar u tahay in la sii xoojiyo.
“Hadii shaki idin kaga jiro, waxaa hortiina ka balan qaadayaa in aan xoojin doonno federaaleynta dalka”
Waxaa uu sheegay in dhawaan loo madlan yahay kulan dhaxmari doona dowladda
federaaalka iyo madaxda maamulada dalka ka dhisan, halkaa oo lagu dhameyn doono
wixii madmadow siyaasadeed ah ee jira.
Bilihi ugu danbeeyay waxaa jiray farqi dhinaca siyaasada ah oo u dhaxeeyay
madaxda maamulada dalka ka jira iyo dowladda federaalka, kaddib markii inta
badan madaxweynayaasha maamul gobolleedyada taageero u muujiyeen xulufada
Sacuudiga iyo Imaaraadka iyaga oo qaatay go’aan ka dhan ah kan dowladda dhexe.
C/raxmaan Diini, Hiiraan Online
[email protected]