Xildhibaannada Aqalka sare oo dood ka yeeshay Khilaafka DF iyo maamul gobolleedyada
Isniin, October, 23, 2017 (HOL) – Kulankii shalay ee xildhibaannada Aqalka sare
ayaa siweyn looga dheehan karay kala qeysanaanta ka dhax jirta gollaha ee la
xiriirta xiisada u dhaxeysa dowladda federaalka iyo maamul gobolleedyada.
Kulanka oo uu shir guddoominayay Cabdi Xaanshi
Cabdullaahi ayaa waxaa aragtidooda arrintan ku saabsan ka dhiibtay xidhibaanno
dhowr ah oo siyaabo iska soo horjeeda u camiray aragtidooda ku aadan khilaafka
jira.
Xildhibaannada qaar ayaa sheegay in dowlad gobolleedyada
dalka jira gafsan yihiin Dariiqa ay
lahaayeen loona baahan yahay in mar walba la ilaaliyo sharciga iyo dastuurka
dalka u yaala iyo awoodaha ay kala leeyihiin dowladda dhexe iyo maamullada
qeybta ka ah federaalka.
Halka xildhibaanno kalana ku doodeen in dowladda dhexe
faragalin toos ah heyso maamul gobolleedyada looban baahan yahay in labada
golle ee dalku leeyahay wax ka qabto faragalintaas.
Laakiin dhinaca kale meesha kama aysan marneyn
xildhibaanno soo jeediyay in arrimaha socda si hoos loo eego, loona saaro guddi
xaqiiqo raadin ah oo u kuurgala wax yaabaha leysku hayo, kuwaa oo socdaal ku
tagaya deegaannada dowlad gobolleedyada dalka.
Xiisada Siyaasadeed ee u dhaxeysa dowlada Federaalka iyo Madaxda maamul
gobolleedyada ayaa sababtay in uu sameysmo Isbaheysi ay ku mideysan yihiin madaxweynayaasha maamul
gobolleedyada dalka ka ka dhisan.
Madaxweynaha dowladda Soomaaliya Maxamed Cabdullaahi Farmaajo ayaan kulan
wadda tashi ah ku martiqaaday madaxda maamul gobolleedyada kaasoo dhawaan dhici
doona.
C/raxmaan Diini, Hiiraan Online
[email protected]
