Madaxweyne Farmaajo oo u anbabaxay qaar ka mid ah wadamada ay ciidamada ka joogaan Soomaaliya
Axad, October, 22, 2017 (HOL) – Madaxweynaha dowladda Soomaaliya Maxamed
Cabdullaahi Farmaajo ayaa goor dhaw u dhoofay magaaalada Kampala ee dalka
Uganda socdaal qeyb ka ah safar uu ku tagi doono qaar ka mid ah wadamada ay
ciidamada ka joogaan Soomaaliya.
Madaxweynaha ayaa madaxda dalka Uganda kala hadli doona arrimo badan oo ay
ka mid tahay dardar galinta howlgalada ka dhanka ah Al-shabaab ee ka socda
qeybo ka mid ah dalka.
“Madaxweynaha wuxuu kala hadli doonaa madaxda dalka Uganda dar dar gelinta
howlgalada ka dhanka ah Al-shabaab, ciidamada Uganda howlgalada socda ayeey
qeyb ka yihiin, doorkooda dagaalka Al-shabaab ayaa laga wada hadli doonaa” ayuu
yiri Sareeye Gaas Cabduwali Jaamac Gorod oo ah taliyaha cusub ee ciidamada
xoogga dalka.
Madaxweynaha ayaa sidoo kale la filayaa in uu socdaalo ku soo maro dalalka
dariska ah qaarkood, gaar ahaana dalalka Jabuuti iyo Ethiopia, isaga oo iyagana
kala hadli doona xaaladaha dalka howlgalada ay isku diyaarinayaan ciidamada
dowladd.
Safarka madaxweynaha waxaa ku wehlinaya xubno ka tirsan golaha wasiirada iyo
masuuliyiin kale.
C/raxmaan Diini, Hiiraan Online
[email protected]
