Madaxweyne Waare oo Jowhar kulan kula qaatay saraakiil ka tirsan AMISOM (Sawirro)
Sabti, October, 21, 2017 (HOL) -- Madaxweynaha Dowlad
Goboleedka Soomaaliyeed ee Hirshabelle Maxamed Cabdi Waare ayaa maanta
Xafiiskiisa ku qaabilay saraakiil ka tirsan Ciidanka Midowga Africa ee Amisom,
Iyagoo ka wad hadlay Xoojinta Wada shaqeynta, iyo xaqiijinta amniga guud.
Madaxweyne Waare ayaa waxaa kulanka Saraakiisha AMISOM uu
la qaatay ku wehlinayay Madaxweyne Ku Xigeenka Dowlad Goboleedka Cali Guudlaawe Xuseen, waxaana kulanka la isku
dhaafsaday sidii ay u wada shaqeyn lahaayeen Ciidamada Dowlad Goboleedka
Hirshabelle ka howlgala iyo kuwa AMISOM iyo in si dhab ah uga qeyb qaataan
sugida amniga guud ahaan deeganada Hirshabelle gaar ahaan Xafladda Caleema
Saarka Madaxweynaha Hirshabelle Dr Maxamed Cabdi Waare oo maalin kaddib lagu
wado in ay ka dhacdo magaalada Jowhar ee Xarunta Dowlad Goboleedka.
Taliyaha Sectar 5 ee ciidamada Nabad Ilaalinta Midowga
Africa ee AMISOM Gen Voctor oo saraakiishaasi hogaaminayay ayaa balan qaaday in
si dhow ay u wada shaqeynayaan saraakiisha Ciidamada Qalabka Sida ee ka howgala
gobolka ayna sii xoojin doonaan xaqiijinta amniga, sidoo kalena ay
qorsheynayaan in ay ka shaqeeyaan dib u dhiska wadooyinka iyo fulinta mashaariicyo
horumarineed oo uu midowga Africa fulinayo.
Madaxweynaha Dowlad Goboleedka Hirshabelle Dr Maxamed
Cabdi Waare ayaa Amisom kaga mahadceliyay sida har iyo habeen ay ugu soo
jeedaan sugida amniga, waxaana uu ku ammaanay doorkooda la xiriira garab istaaga
Soomaaliya, waxaana uu si qoto dheer saraakiisha uu kaga warbixiyay sida
mudnaanta koowaad uu u siinayo amniga iyo sida lagama maarmaanka ay u
tahay in la iska kaashado howlaha horyaala ciidamada si gaar ah waxaa uu
carabka ugu adkeeyay sidii loo xaqiijin lahaa amniga inta lagu gud jiro
xafladda caleema saarka oo dhaceysa 23 bishan oo maalin uun ay ka harsantahay.
Madaxweynaha Dowlad Goboleedka Hirshabelle Dr Maxamed
Cabdi Waare ayaa mudada uu joogo xafiiska sidaan oo kale kulama Muqdisho kula
soo qaatay Saraakiisha ugu sareysa Ciidamada Midowga Africa Amisom, iyo kuwa
Soomaalida oo uu kala hadlayay arrimaha Amniga deegaanada Hirshabelle iyo sida
muqadas ay u tahay in cadowga laga dulqaado bulshada ku dhibaateysan Deegannada
Hirshabelle oo ay go’doomiyeen kooxda isku biirsatay leynta iyo dabar
goynta umadda Soomaaliyeed ee Al Shabaab.
Mustaf Hussien
[email protected]
