Jimco, October, 20. 2017 (HOL) – Diyaarad siday deeq dawo ah oo ka timid
dalka Itoobiya ayaa maanta ka soo degtay garoonka diyaaaradaha magaalada
caasimada ah ee Muqdisho.
Wafdiga diyaarada la socday ee Itoobiya ka yimid waxaa soo dhaweeyay mas’uuliyiin
ay ka mid aheyd wasiirka caafimaadka dowladda federaalka Soomaaliya Fowsiyo
Abiikar Nuur, Xildhibaano, iyo masuuliyiin kale.
Wasiirka caafimaadka Soomaaliya Fowsiyo Abiikar Nuur oo halkaasi
warbaahinta hadal kooban ku siisay ayaa uga mahadcelisay dowladda Itoobiya,
garab istaaga iyo hiilada ay la barbar taagan yihiin dowladda iyo shacabka
Soomaaliyeed.
Dhinaca kale safiirka Dowladda Itoobiya u fadhiya Soomaaliya Jamaaludiin
Mustaf Cumar oo dhankiisa la hadlay warbaahinta ayaa sheegay Deeqdan midan
keliya in aysan aheyn, sidoo kalena maanta gelinka dambe la filayo in Muqdisho
ay timaado Diyaarad kale oo Itoobiya ka socota.
Dowladaha Mareykanka, Turkiga, Kenya, Qadar iyo Jabuuti ayaa Todobaadkan
sidoo kale Muqdisho waxay u soo gaarsiiyeen gargaar caafimaad oo ay ku
taageerayaan dadkii ku waxyeeloobay Qaraxii Zoobe.
C/raxmaan Diini, Hiiraan Online
[email protected]