Kumannaan dadweyne ah oo Salaadii Jicmaha kaddib Janaaso ku tukaday barxada Isgoyska Zoobe
Jimco, October, 20. 2017 (HOL) – Kumanaan dadweynaha reer Muqdisho ah ayaa
maanta Salaadii Jicmaha kaddib waxaa ay Janaaso wadareed ku tukadeen baraxada
Isgoyska Zoobe oo Sabtidii 14kii bishan uu ka dhacay qaraxii cuslaa.
Dadkan oo ay hoggaaminayeen Culumaa’udiin ayaa barxadii uu qaraxa ku laayay
boqolaalka qof istaagay, waxaa ay u duceeyeen dadkii ku dhintay musiibadaas
Sheekh Cabdi Xayi oo ka mid ahaa Culimadii hoggaminayay ayaa alle uga baryay
dadkii ku dhintay masiibadaas in naxariistiisa janno ka waraabiyo, waxaana qof
walba uu u akhrinayay duco gaar ah.
Wasaaradda Diinta iyo Awqaafta ayaa dhowaan ku baaqday in Salaada jimcaha
kaddib la isugu tago goobtii qaraxa, isla markaana loo duceeyay dadkii ku
dhintay musiibadaas.
Magaalada Muqdisho marka aad tagto goobaha dadku ku badan yihiin lagu kulmo
ama aad raacdo gadiidka dadweynaha hadal heynta ugu badan ee bulshada ah
qaraxii Zoobe oo noqday mid taariikh madow ku reebay maskaxda qoysas badan oo
Soomaaliyeed oo qaraxaa ku waayay dad ay jeclaayeen.
C/raxmaan Diini, Hiiraan Online
[email protected]
