Jimco, October, 20. 2017 (HOL) – Degmada Xudur ee gobolka Bakool ayaa waxaa
ka dhacay kulan looga hadlayay arrimo la xiriira amniga iyo dib u celinta dadka
ku soo barakacay degmada.
Kulankan ayaa waxaa ka qeyb galay maamulka gobolka Bakool, kan degmada,
laamaha amniga, odayaasha, dhalinyarrada iyo haweenka.
Maxamed Macalin Axmed guddoomiyaha degmada Xudur oo goobta ka hadlay ayaa
shacabka ugu baaqay in ay la shaqeeyaan ciidamada ammaanka, si loo gaaro guulo
hormar leh oo la taaban karo.
“Shacabka degmada Xudur, waa dad isku xiran, waxay diyaar u yihiin in ay la
dagaalamaan cid ka shaqeyneysa Amni darro, waxaa nalooga baahan yahay in aan ka
wada shaqeyno hormarka degmada” ayuu yiri guddoomiyaha degmada.
Maalmo ka hor ayaa ciidamada ka tirsan dowladda federaalka iyo Al-shabaab
waxay ku dagaalameen meel aan ka baxsaneyn degmada Xudur, Saraakiisha ammaanka
waxay sheegeen dagalkaasi in ay ku dileen xubno ka tirsan Al-shabaab, laakiin
Al-shabaab wax hadal kama aysan soo saarin.
C/raxmaan Diini, Hiiraan Online
[email protected]
