Sabti, Octobar,14, 2017 (HOL)- Afhayeenka
Ciidanka Booliska Somaliland, Gaashaanle Sare, Faysal Xiis Cilmi, ayaa
shaaciyay inay sagaal eedaysane ay u hayaan afar bas oo dhawaan lagu gubay magaalada
Hargeysa oo la garan waayey cid gubtay, iyadoo gubanaya uun la arkay.
Ciidamada booliska ayaa baadhitaan ku waday cidda ka dambaysay inay
Basaskaasi rakaabka qaada loo gubay, waxaanay sheegtay in sagaal qof loo xidhay
Basaaskaasi la gubay.
Afhayeenka ciidanka boolisku wuxuu caddeeyay in eedaysanayeyaasha
qaarkood gacanta lagu dhigay iyagoo dambiga loo haysto gacanta kula jira.
“Beryahan danbe waxaad la socoteen in gaadiidka dadweynuhu ay raacaan
ee basaska la gubay, falkan oo ah mid ugub ku ah Somaliland, taliska ciidanka
boolisku wuxuu amar adag ku bixiyay in dadkii falkan gubista gaadiidka geystay
si adag loo baadho. Nasiib wanaag ciidammada boolisku waxay xalay gacanta ku soo dhigeen sagaal eedeysane oo
qaarkood lagu hayo iyaga oo gaadiidkii gubaya, gacantana ku sita qalabkii ay u
adeegsanayeen gubista gaadiidka dabkiina ku qabtay ayay ciidammada boolisku
gacanta ku soo dhigeen faahfaahinta baadhitaanka kiiskanna ka hor dhici
maayo,”ayuu yidhi afhayeenka ciidanka booliska Faysal Xiis.
Waxa kaloo uu intaas ku daray ; “Waxaanu bulshada u sheegaynaa in
ciddii falalka noocaasi ah lagu soo qabtay in ciqaab aad u culus la marin
doono, oo aanay boolisku marnaba u dulqaadan doonin. waayo waa dad duulan ku ah
ganacsiga iyo nabadgelyadaba.”
“Bulshada Somaliland waxaan leeyahay sidii aad awalba noola shaqeyneyseen
noola shaqeeya. Waxaan mahad aad u ballaadhan ayaanu idiin haynaa ciidan ahaan,
waxaa loo baahan yahay in wixii falalka noocan oo kale ah sameynaya aad gacan
nagu siisaan sidii gacanta loogu qaban lahaa. ciidanka booliska Somaliland-na
meel kasta oo uu joogo waxa uu heegan ugu jiraa sugida amniga.”
Dhowaan bay ahayd markii dhawr
Bas oo dabqabsaday la arkay iyadoo la garan waayey cid gubtay iyo sabab loo
gubay.
Barkhad-ladiif M. Cumar,
Hiiraan Online
[email protected]
Hargeysa, Somaliland.