Arbaco, October, 11, 2017 (HOL) – Wasaaradda
amniga dowladda Soomaaliya ayaa sheegtay in uu soo hagaagayo amniga caasimada
Soomaaliya ee Muqdisho, waxaana ay ugu baaqday shacabka in ay la shaqeeyaan
ciidamada.
Afhayeenka Wasaaradda Amniga Axmed Maxamuud Sayid Carab ayaa sheegay in howl
galada xasilinta ee ka socday magaalada Muqdisho uu suura geliyay in hubkii
cuslaa ee lagu watay magaalada la uruuriyo, isla markaana uu yaraado hubkii
cuslaa ee lagu wadan jiray magaalada.
“Magaalada Muqdisho hubkii faraha badnaa ama qoryihii cuslaa, sida BKM iyo
baabuurti ciidamada waa yaraadeen, waxay taas ku timid howl galada ciidamada
xasilinta oo lagu uruuriyay hubka sharci darada”ayuu yiri Afhayeenka Wasaaradda
Amniga.
Afhayeenka ayaa intaa ku daray in
ammaanka magaalada uu soo hagaagay, isla markaana Wasiirada qaar ammaankooda ay
ilaaliyaan labo askari kaliya sida uu hadalka u dhigay.
Waxaa uu ugu baaqay shacabka Gobolka Banaadir inay ku baraarugaan in
Shabaabka ay duulaan ku yihiin, isla markaana cid walba ay u siman yihiin inay
dilaan, loona baahan yahay inay kacdoon wadajir ah sameeyaan, si Shabaabka
looga soo horjeesto.
Magaalada waxaa ka soconaya howlgalo habeen iyo maalin ah oo ay wadaan
ciidamada xasilint oo aad ku arkeyso Isgooysyada muhiimka ah iyaga oo baaraya
gadiidka gaarka loo leeyahay iyo kuwa dadweynaha.
C/raxmaan Diini, Hiiraan Online
[email protected]
