Talaado, November 07, 2017
(HOL)- Ciidanka Amniga Somaliland ayaaa sheegay inay qabteen dad qoysas
danyar ah kaadhadhkii ay ku codaynayeen ugu bedelaya raashin,isla markaana
urursanaya kaadhadh aanay lahayn.
Kaadhadhkan la urursanayey ayaa
la sheegay inay ahaayeen laba iyo lixdan kaadhkii codeynta, kuwaas oo dadkii
lahaa loogu bedelay raashin, waxaanay ciidanka gacanta ku soo dhigeen
kaadhadhkii iyo dadkii urursanayey ee lagu qabtay.
“Ciidanka booliska somaliland
waxay gacanta ku soo dhigeen sadex eedaysane oo dumar ah kuwaas oo dadka kaga
urursanayey kaadhadhka codbixinta, waxaanay falkaasi ka dhacay xaafada Axmed macalin Haaruun, dadkaasi
waxay ku gafeen xeerka doorashooyinka madaxtooyada ee golaha deegaanka ee Xr Lr
20 kaas oo soo baxay sanadkii 2001-dii,”ayuu yidhi afhayeenka ciidanka Booliska
Faysal Xiis Maxamed.
Waxaanu intaas ku daray
“Sadexdaas eedaysane waxay dadka danyarta ah kaga urursanayeen kaadhadhka oo ay
ku lahaayeen waxaanu idin siinaynaa rubucyo raashin ah iyo biyo, waxaanay
ciidanka boolisku gacanta ku soo dhigeen 62 kaadh oo ah kuwii codbixinta ah iyo
sadexdaas eedaysane oo ku kacay falal ka dhan ah xeerka nidaamka doorashooyinka
madaxtooyada, Siday sheegeen eedaysanayaashu waxay ka shaqaynayeen xafiis ku
yaala degmada Gacan Libaax, waxaanay kala sheegteen inay yihiin gudoomiye,
xidhiidhiye iyo xoghayn.”
Afhayeen Faysal Xiis isagoo
arrintan sii sharaxaya waxa uu yidhi “waxa kale oo ciidanka boolisku soo qabteen hal nin oo
dadka ka diiwaan geliyey xaafada Daami, kaas oo aanay ogayn guddida doorashadu,
waana dambi, nimanka waxaas samaynayaa waa niman khal khal galinaya amniga
qaranka.”
Sidoo kale taliye ku xigeenka
ciidamada booliska Somaliland Sareeye Guuto Cabdiraxmaan Liibaan Fooxle ayaa
isaguna ka digay falal xumayn kara amaanka waxaanu yidhi “Sida aynu ognahay
ololihii doorashadu waa gaba gabo oo waa dhaw yahay, si wanaagsan oo nabad
galyo ah ayaanay ciidanka booliska iyo
asxaabtuna uga hawl galay, waxa kale oo inagu soo kordhay khaladaad badan oo
keeni karta in nabad galyadu khatar gasho oo ay ka mid tahay kaadhadh la
urursanayo oo laga ururinayo dadkii lahaa, taasina nabad galyo xumo weyn ayey
keenaysaa.”
Dhinaca kale, guddida
doorashooyinka Somaliland ayaa sheegay in wax laga xumaado tahay in la isku
dayo in dad kaadhadhkii codeynta ahaa laga urursado, waxaanu sheegay in dambi
qaran tahay oo xeerka doorashaduna tilmaamayo ciqaabta qofka sidaas sameeya.
“Kaadhkan lagu codaynayaa waa
astaantii qaranka, lacagta ku baxday waa labaatan Milyanin in ka badan, tamar
iyo karti badan baa gashay sidii kaadhkaasi loo samayn lahaa, maaanta waxa
nasiib daro ah in Hargeysa dhexdeeda oo caasimadii ah oo la islahaa waa
meelihii ugu ilbaxsanayd in kaadhahdkii dadka masaakiinta ah laga urursado oo
loo adegsado sifo sharci daro ah”ayuu yidhi gudoomiyaha guddida doorashooyinka
qaranka C/qaadir Iimaan.
Waxa uu intaas ku daray “Waxa na
loo sheegay in la qabtay dumar iibsanayayey kaadhadh sifo sharci daro ah ku
iibsaday waxa la qabtay laba iyo lixdan kaadh oo dad koobani qaadanayey, waa
arrin aanu ka argagaxnay”
Gudoomiyuhu waxa uu sheegay in
sharciga lala tiigsanayo,isla markaana waxa uu dadweynaha u akhriyey qodobada
ka hadlaya in sifo khaldan loo adeegsado kaadhadhka codeynta, waxaanu yidhi
“Qodobka 67aad ee dastuurka farqdiisa kowaad qof kasta oo layimaad goob kaadh
aanu lahayn iyadoo ujeeddu tahay inuu codeeyo waxa uu galay dambi, waxaanu
mutaysanayaa sanad ama laba sanno oo xadhig ama ganaax laba milyan illaa saddex
milyan oo Somaliland shilling ah.Qof kasta oo kaydsada kaadh codbixinayd oo qof
kale leeyahay isagoo ujeedadisu tahay in maalinta codbixinta si khaldan uga
faa’iidaysto waxa uu galay dambi waxaanu mustaystay lix bilood ilaa laba sanno
oo xadhig ah”
Si kastaba ha ahaatee, baryahan
dambe wararka suuqa la isla dhexmarayey ayaa sheegayey in xisbiyaddda qaarkood
deegaanadda u arkaan in aanay codad badan ka helayn ay dadka ka iibsanayeen sii
ay u dhimaan codadkii xisbiga kale heli lahaa, haseyeeshee oo dadka badankoodu
u haystay inay been tahay waxa ay dhabowday markii dad kaadhadhka iibsanayey
ciidanka amaanku gacanta ku dhigeen.
Barkhad-ladiif M. Cumar,
Hiiraan Online
[email protected]
Hargeysa, Somaliland.
