Sabti, November 04, 2017 (HOL)-Xukuumadda
Somaliland ayaa maanta rusqaddii kala noqotay telefishanka KALSAN TV oo ka mid
ah telefishanadda af soomaaliga ku hadla ee ka hawlgala Somaliland.
Telefishankan ayaa lagu eedeeyey inuu sameeyey warar been abuur
ah,isla markaana dhawr jeer oo hore loo digay, haseyeeshee ku adkaysteen inay
warar aan jirin ka baahiyaan Somaliland.
Wasiirka Warfaafinta Somaliland Cismaan Saxardiid Cadaani ayaa
xayiraad ku soo rogay Kalsan tv, waxaanu ku eedeeyey inuu faafiyey warar been
abuur ah oo u ka soo qaaday baraha bulshadda taas oo uu sheegay inuu ku
waxyeeleeyay habsami socodka doorashadda Somaliland.
“Telefishanka Kalsan tv wuxuu xadgudub ku sameeyey qaranimadda
Somaliland,isla markaana baahiyey November 3-deedii/2017 war been abuur ah oo
uu ka soo qaatay baraha bulshadda taas oo uu ku sumcad dilayey habsami u
socodka ololaha doorashadda”ayaa lagu yidhi xayiraadda wasiirka warfaafinta ka
soo baxday .
“Telefishanka Kalsan tv wuxu ku celceliyey warar iyo warbixino uu
iskaga hor keenayo bulshadda,isla markaana cadaystay inuu abuuro warar been
abuur ah oo khatar ku ah amniga isagoo ku gabanaya shaadhka saxaafadda”ayaa la
raaciyey qoraalkeedda.
Wasiirka Cadaani ayaa sheegay in aanay dhibaato ka dhicin magaaladda
Laascaanood,isla markaana aanay jirin wax ku dhaawacmay iyo khasaare kale oo
shalay kadhacday magaaladda Laascaanood markii uu xisbiga KULMIYE dhoolatuska
ka dhigayey magaaladaasi, waxaanu sheegay in KALSAN TV warkaasi ka dhigay mid
dhaawc iyo qalalaase ka dhacay Laascaanood,isla markaana aanu khudbad ka jeedin
gudoomiyaha xisbiga, waxaanu wasiirku beeniyey in warkaasi uu Telefishanku
baahiyey aanu jirin.
Barkhad-ladiif M. Cumar,
Hiiraan Online
[email protected]
Hargeysa, Somaliland.
