Gabar 12 Sano jir ah oo wacdaro ka dhigtay ciyaarihii Soomaalida ee Atlanta lagu soo gaba-gabeeyay Sawirro
Isniin,
November, 27, 2017 (HOL) - Gabar Soomaaliyeed oo lagu magacaabo Ayaan Axmed
Maxamuud oo ka mid ah kooxda Kubadda Cagta da’doodu ay ka yareyd 12 sano jirka
ee Gobolka Tennessee u mataleysay, ciyaarihii qaboobaha Soomaalida ee dhawaan
lagu soo gaba-gabeeyay magaalada Atlanta, ayaa wacdaro ka dhigtay intii
ciyaarahu ay socdeen.
Gabadhaan
oo noqotay qofkii loogu hadal haynta badnaa intii ciyaaruhu ay socdeen, ayaa
aheyd gabadha kaliya ee ciyaareysay. Waxeyna dhanka weerarka ee Lambarka 9-aad
oga dheeleysay kooxda da’da yar ee Kubadda Cagta gobolka Tennessee oo Captain
ay u aheyd.
Sidoo
kalana ku dhawaad 10 Goal ayey ka dhalisay saddex kulan oo ay ku ciyaareen
gudaha garoonka dadan ee indoor-ka, oo ciyaaraha badankoodu ay ka dhaceen.
Ciyaartii
ugu horesay ee naadiga Kabtanka ay u tahay ciyaaryahanadan ay dheeleen
Khamiistii aynu soo dhaafnay ayeey ka dhalisay 4 Gool kooxdii ka soo horjeeday,
iyadoo garoonkana ku dhex yeelatay taageerayaal badan oo horay aanan u aqoonin.
Ciyaartooydii hore ee xulka Qaranka Soomaaliyeed, Tababarayaal iyo
waliba Garsoorayaashii ka qeyb galay ciyaarahan oo ay ka mid ahaayeen;
Garsoore Maxamed Xasan Qolof iyo Tababare Maxamed Xaaji Giftin oo labadoodu
horay ogu soo ciyaaray Soomaaliya, ayaa aad u ammaanay qaab ciyaareedka iyo
qibrada ay kubadda cagta u leedahay gabadhan yar.
Cabdicasiis
Mahdi oo ah Macallinka layliya kooxda Gabadhan ay ka tirsan tahay oo ka dhisan
magaalada Nashville ee gobolka Tennessee, ayaa Hiiraan Online u sheegay in
saddex bilood ka hor uu ogaaday in Ayaan ay ku wanaagsan tahay ciyaaritaanka
Kubadda Cagta.
Tababare
Cabdicasiis oo sannadihii 1982 illaa 1988 ka mid ahaa ciyaartooydii Naadigii
Muqdisho, kulana guuleystay horyaalka Soomaaliya iyo koobkii General Daa'uud.
Sannadihii 1993 illaa 1998 Tababare u ahaa Kooxdii Interglobe Enterprise oo
markii danbe loo bixiyay Kooxdii Dekadda.
Sidoo
kalana 1997-dii noqday Macallinka xulka Qaranka Soomaaliya ayaa tilmaamay in
muddo dheer uu Tababare u ahaa koox ka dhisay gobolka Tennessee, laakiin saddex
bilood ka hor uu bilaabay Naadigaan da’da yare oo ay ka wada tirsan yihiin
Ayaan Axmed iyo walaalkeed ka yar oo lagu magacaabo Cabdullaahi Axmed oo 9 sano
jir ah iyo waliba labo gabdhood oo kale oo da’doodu uu ku sheegay iney 6 sano
ka yar tahay.
Macallin Cabdicasiis, ayaa tibaaxay in bilihii la soo dhaafay Ayaan
aynan mararka qaar ka qeyb galin tababaro ay kooxdu qaadaneysay madaama
gabadhan yar aysan baabuur wadi karin, dhibaatana ay ka haysatay dhanka
socdaalka.
Laakiin Tababaraha ayaa caddeeyay in uu hadda kaddib qaadi doono
mas'uuliyada dhanka socdaalka, uuna ciyaaryahanadan iyo walaalkeed ka soo qaadi
doono gurigooda kaddibna uu ku celin doono marka tababarka ay dhammeysataan.
Ayaan
Axmed oo ku dhalatay Xerada Qaxootiga Kakuma ee ku taallo waqooyi galbeed dalka
Kenya ayaa Mareykanka timid saddex sano ka hor 2014-kii, waxeyna ka mid tahay
qoys ka kooban Hooyo, Aabo, saddex Wiil iyo labo Gabdhood.
Ayaan
ayaa HOL u sheegtay in Banooniga ay bannaanka kula ciyaari jirtay carruurta yar
yar markii ay Kaakuuma joogtay, ka dib markii ay Mareykanka timid ay arragtay
koox Mareykan ah oo Banooni ku ciyaarto garoon ku yaallo halka loo yaqaano Selby
Park oo aanan ka fogeyn guriga ay ka dagan yihiin magaalada Nashville,
Tennessee.
Kooxda ka
dhisan Shelby Park oo iskugu jiro carruur Caddaan iyo Madoow Mareykan ah ayey
Gabadhaan yar sheegtay iney la ciyaartay Banooni, ka dibna tababarihii kooxda
uu u ogolaaday iney ka mid noqoto naadigaas oo wali isagana ay ka tirsan tahay.
Ugu
danbeyn Ciyaaryahanad da’da yar, ayaa mudadii koobneyd ee joogtay magaalada
Atlanta waxey ku guuleysatay abaalmarino kala duwan oo ay ka mid yihiin Koob
iyo Bilad ay ku muteysatay ciyaar wanaagii ay soo bandhigtay xilligii tartanku
uu socday.
Najah Mohamed Ali, Hiiraan Online
E-mail: [email protected]
Atlanta, Georgia – Mareykanka