Madaxweyne Siilaanyo oo kulamo la yeeshay Culimadda, madax dhaqameedka iyo guddida doorashooyinka
Khamiis, November 02, 2017
(HOL)- Madaxweyne Axmed Maxamed Siilaanyo ayaa kulan la yeeshay culimadda,
madax dhaqameedka iyo guddida doorashooyinka Somaliland, kuwaas oo ka wada
hadlayey habsami socodka ololaha.
Madaxweyne Siilaanyo ayaa sheegay inuu amar ka soo saaray in hantidda
iyo gaadiidka dadweynaha lagu ololayn,isla markaana si anshaxa iyo diintu
ogoshahay u ololeeyaan saddexda xisbi ee tartanka ka dhexeeyo.
Kulankan uu la yeeshay Madax-dhaqameedka, Ganacsatada, iyo Culimada
Dalka ayaa ka qabsoomay qasriga madaxtooyada, waxaanu kulankaasi ahaa mid
dardaaran iyo baraarujin isugu jira oo uu madaxweynuhu kula dardaarmayey
masuuliyiintaasi inay qayb ka noqdaan in dalka ay ka qabsoonto doorasho xor iyo
xalaal ah oo ay ku kala calaf qaadaan asxaabta qaranka ee ku tartamaya
doorashada ay inaga xigto maalmaha koobani, waxaanu madaxweynuhu khudbad ka
jeediyey kulankaasi.
“ Ujeedada aan kulankan idiinku
yeedhay, waxa uu daaran-yahay, in aan idinku guubaabiyo, in aad nagala
shaqaysaan wacyi-gelinta iyo midnimada bulshada. Xilligan Xaasaasiga ah, waxa loo baahan
yahay, in aynu iska kaashanno, yareynta
xanafta iyo xiisadaha ka dhalan kara xafiiltanka siyaasadda. Waxa Odayaal
ahaan, dhammaanteen inala gudboon, in aynu ka hor tagno, in ummadda la
dhex-dhigo cunfi, ciil-qab iyo cadaawad siyaasadeed, taasoo u hor-seedi karta
qo-qob iyo kala-qaybsanaan, raad xun ku reebta mustaqbalka noloshooda.”ayuu
yidhi madaxweyne Siilaanyo.
Waxaanu intaas ku daray “ Ummad ahaan, waxa maanta ina saaran xil
culus iyo masuuliyad wadareed. Waxa hubaal ah, in aynaan kaga gudbi karin
xaaladdan nin toocsi, tafaraaruq iyo talo xumo. Qaran gob ahi, wuxuu kaga
gudbaa duruufaha adag, ee la xidhiidha doorashooyinka, dulqaad, degenaansho,
danta guud oo laga hor mariyo ta gaar ahaaneed, bisayl, iskaashi, midnimo iyo
wada-jir. Duco-qabayaal, waa in aynu, dhinac uga soo wada jeesanno, cid kasta
oo abuuraysa xasilooni darro iyo xiisad colaadeed. Waxa waajib ku ah,
muwaadiniinta Somaliland iyo Waayeelka hortayda fadhiya, in ay gacan siiyaan
ciidammada qaranka ee ku hawlan, adkaynta nabadgelyada iyo sugidda amniga
qaranka.”
Mar uu la dardaarmayey saddexda xisbi waxa uu yidhi “Aniga oo
munaasibaddan ka faa'iidaysanaya, waxaan leeyahay Xisbiyada Qaranka, dalkani
wuxuu ku nabad iyo caano-maalay, hab-dhaqan ku dhisan tudhaale, talo-wadaag,
tawfiiq iyo isu-tanaasul. Murti Soomaaliyeed ayaa tidhaahda "Caado La
Gooyaa, Cadho Alle Ayey Leedahay". Sidaa darteed, waxa waajib ku ah,
Musharixiinta u tartamaysa hanashada hogaanka dalka, in ay dhawraan xurmada iyo
xuquuqda ay leeyihiin, dadka ay codka ka doonayaan. Sidoo kale, waxaan ku
adkaynayaa, in ay u hogaan-samaan go'aamada Guddida Doorashooyinka, Xeerarka,
Shuruucda, iyo Nidaamka Doorashada u dejisan.”
Sidoo kale, waxa iyaguna halkaasi ka hadlay culimadda, madax
dhaqameedkii iyo ganacsataddii oo sheegay in aanay ogolaan doonin in wax
dhibaato ahi ka dhacdo dalka,isla markaana mar walba diyaar u yihiin inay
qaybka noqdaan wixii amniga iyo nabadda kala shaqeeyaan xukuumadda.
Dhinaca kale, madaxweynuhu waxa kale oo uu la kulmay guddida
doorashooyinka, waxaanu ka dhagaystay qaabka ay ilaa hada u socoto u diyaar
garawga doorshooyinka Somaliland oo ay ka hadhsan tahay wax ka yar 12 maalmood.
Guddoomiyaha komishanka doorashooyinka qaranka Cabdiqaadir Imaan
Warsame oo warbaahinta uga war bixiyay kulanka ay la qaateen madaxweynaha ayaa
yidhi " waxaanu madaxweynaha iyo xukuumadiisaba uga mahad naqaynaa mudadii
aanu xafiiska joognay tacabkii uu na galiyay iyo gacantii uu nasiiyay, waxa
kale oo aanu madaxweynaha uga mahadcelinay sidii uu u qaadatay inuu lacagta
doorashada wada bixiyo kadib markii deeq bixiyayaashu nagu yidhaahdeen mahayo
lacag aanu idinku caawino, go'aan dhiiran ayuu ahaa, waxaanu halkan uga mahad
celinaynaa shacab weynaha reer Somaliland meel kasta oo ay joogaanba sidii ay
amarada komishanka u qaadanayeen iyo sidii ay ugu soo jeedeen in qarankan
doorashooyinkiisu aanay is taagin, waxa kale oo aanu u mahadcelinaynaa qolada
deeq bixiyayaasha oo aad inoo caawiyay, waxa kale oo aanu u mahad celinaynaa
saddexda xisbi qaran, waxaanu leenahay saddexda guddomiye waad mahadsan tihiin,
waxaynu soo marnay diiwaangelin casri ah oo ALLE inagu guuleeyay, waxa kale oo
aynu galnay kaadh qaybintii, maanta waxaanu u ambabaxaynaa 6da gobol ee dalka,
sanaaduuqdii doorashaduna maanta ayay meel kasta tagayaan”
Guddomiyaha komishanka ayaa shacabka reer Somaliland ka codsaday inay
kalooni buuxda siiyaan xubnaha komishanka.
Bishan November 13-keedda ayaa lagu wadda inay doorashaddu dhacdo,isla
markaana waxa wali ka socda magaalooyinka waaweyn ololaha ay xisbiyaddu ku soo
bandhigayaan haddii la doorto waxay qaban doonaan, taas oo dadweynaha ka
codsanayaan inay u codeeyaan.
Barkhad-ladiif M. Cumar,
Hiiraan Online
[email protected]
Hargeysa, Somaliland.