Khamiis, November, 02, 2017 (HOL) – Guddiyada Amniga iyo Difaaca ee
baarlamaanka federaalka Soomaaliya oo maanta mar kale kulan ku yeelanaya
magaalada Muqdisho ayaa waxa ay kulan ka yeelanayaan xaalada amni ee dalka iyo
sidii wax looga qaban lahaa amni darada ka jirta Muqdisho.
Kulanka Guddiyada Difaaca iyo Amniga baarlamaanka oo looga ka doodayo
xaalada amni ee dalka ayaa waxa uu qorshaha yahay inuu si gaar ah uga dhaco
Xarunta Villa Hargeysa ee magaalada Muqdisho.
Xildhibaan Daahir Amiin Jeesow oo ka mid ah guddiga Amiga baarlamaanka oo
la hadlay warbaahinta ayaa sheegay in maanta ay kulan la yeelanayaan Guddiga Difaaca,
sidoo kalena kulan ay horey ula yeesheen hay’adaha amniga in ay kaga soo
qaateen warbixino, ayna horgeyn doonaan Baarlamaanka.
Xuseen Carab Ciise oo ah Guddoomiyaha Guddiga Difaaca ee Baarlamaanka
Federaalka Soomaaliya ayaa dhinaciisa sheegay in maanta oo Khamiis ah ay soo
saari doonaan warbixin la xiriirta ammaanka, kadib markii maalmahan dambe ay
kulamo la yeelanayeen Hay’adaha amniga.
Xildhibaano ka tirsan Baarlamaanka Federaalka Soomaaliya ayaa Todobaadkan
waxaa ay mooshin la xiriira xaalada amni ee dalka u gudbiyeen Baarlamaanka
Soomaaliya.
C/raxmaan Diini,
Hiiraan Online
[email protected]