Jimco, November,17 2017
(HOL) – Komishanka Doorashooyinka ayaa iska difaacay waraaqo uu xisbiga WADANI
soo bandhigay oo uu ku eedeeyey in dad gaar ahi soo daabacdayn oo lagu
codaynayey, waxaanu arrintaasi ku tilmaamay mid aanay jirin.
Komishanka Doorashooyinka ayaa sheegay in uu dacwad ka gudbin
doono cidii waraaqahaasi been abuur ah lagu qabto, waxaanu xusay in aanay
waraaqaha lagu codeynayo aanay cidi arag,isla markaana aad loo adkeeyey.
Sidoo kale, waxay sheegeen inay cid kasta oo cabanaysa
diyaar u yihiin, islamarkaana arrimaha ka cabanayaan la xalin doonnaan.
“Waxaanu wargalinay cid walba oo ka cabanaya ama cabasho
qaban waanu dhagaysanayn sidii aanu horaba idin dhagaysan jirnay, cabasho walba
albaabayadu way u furan yahay, cidii cabasho qabta diyaar baanu u nahay”ayuu
yidhi Gudoomiyaha Komishanka C/qaadir Iimaan.
Waxaanu intaas ku daray “uma baahnin in uu wiil inaga dhinto,
waxaana inoo dhacday doorasho qurux badan, marka waa in natiijadeedda la sugo,
wixii sharci waafaqsan ee cabasho ah diyaar baanu u nahay in aanu xalino cid
kasta oo qabto.”
Gudoomiyuhu wuxu sheegay in Doorashadani ahayd mid casri ah
oo la adkeeyey nidaamkeeda iyo habkeedda, waxaanu usheegayna saddexda xisbi
qaran in ay ku kalsoonaadaan shaqadayada sidii ay awal horaba ugu kalsoonayeen.
“Waxaa warbaahinta laga sheegay waraaqo ku shubasho ah ama
saayid ah ayaanu meel ka helney qolo ku doodaysa, waraaqaha codeynta lama arag
lama arki karo lamana foojar garayn karayn, sharciga la tiigsanayna cidii
waraaqaha keenay ayey ku kooban tahay dacwad baanu ka qabna kamana hadhayno oo
sharciga ayuu ku gafay, wax naga soo baxay wali ma jiraan.”ayuu yidhi Iimaan oo
iska difaacayey eeddaha loo soo jeediyey.
Dadweynaha waxay usoo jeediyeen inay is dajiyaan oo aanay ka
hor dhicin natiijadda soo wadan.
Xisbiga WADANI ayaa Komishanka ku eedeeyey inay ka qancin waayeen
cabasho ay usoo gudbiyeen, isla markaana joojiyey wada shaqayntii ay la
lahaayeen Komishanka, taas ayaana keentay in rabashaddo xalayba ka dhacaan
dhawr magaalo, inkastoo markiba ciidanku joojiyey.
Barkhad-ladiif M. Cumar, Hiiraan
Online
[email protected]
Hargeysa, Somaliland
