Talaado, November, 14, 2017 (HOL) – Munaasabad
ay haweenka Soomaaliyeed tageero ugu muujinayaan ciidamada qalabka sida ee
Soomaliyeed oo ay soo qabanqaabisay wasaarada Dhalinyarada iyo Cayaaradaha ayaa
lagu qabtay magaalada Muqdisho.
Ra’iisul wasaaraha xukuumadda Soomaaliya oo munaasabada ka hadlay ayaa kula
dardaarmay haweenka Soomaaliyeed in ay hormuud u noqdaan dagaalka dalka lagula
jiro Al-shabaab, wuxuna xusay in haweenku ay yihiin bad-baadiyaha Qaranka
kaalin muuqatana ka soo qaateen halgankii xorriyadda iyo xiliyadii adkaa ee
dalku soo maray.
“Haweenku waxey leeyihiin Taariikh Weyn oo dhanka halganka iyo Xornimo
doonkii dalka, waxaana loo baahan yahay in aad hormuud ka noqotaan xoreynta
dalka, ma aqbali karno in Al-shabaab maalin walba uu dilaan dad Soomaaliyeed oo
waxba galabsan, waa in aan kuligeen u istaagnaa difaaca Qaranka” ayuu yiri ra’iisul
wasaaraha oo la hadlayay haweenka Soomaaliyeed.
Mudane Xasan Cali Khayre ayaa tilmaamay in Xukuumadda ka go’an tahay dumarku in
ay door fir-fircoon ku yeeshaan siyaasadda iyo go’aamada lagu hagayo dalka.
“Go’aanka ah in 30% kuraasta Xildhibaannada
Baarlamaanka loo qoondeeyo haweenku waa tillaabo dhaxalgal ah oo loo qaaday
dhanka wanaajinta doorka dumarku ugu qaadanayaan gaarista go’aamada muhiimka u ah
dalka, hadda wixii ka dambeeyana waxaan ka shaqeyn doonaa in dumarku ay helaan
fursado ka badan kuwii hore” ayuu hadalkiisa sii raaciyay.
Wasiirka Dhalinyarada iyo Cayaaraha Khadiijo Maxamed Diiriye iyo guddoomiyaha
haweenka Qaranka Batuulo Sheekh Axmed Gaballe ayaa sheegay in ay garab taagan
yihiin ciidamadda qalabka sida, kana qeyb qaadanayaan dagaalka lagu xoreynayo
dalka.
C/raxmaan Diini, Hiiraan Online
[email protected]
