Isniin, November 13, 2017 (HOL)- Saddexda Musharax ee
xisbiyadda Somaliland iyo madaxweyne Axmed Siilaanyo ayaa ka codeeyey xarunta
hay’adda shaqaalaha ee badhtamaha magaaladda Hargeysa.
Madaxda sarsare ee xukuumadda iyo
hogaamiyeyaasha xisbiyadda ayaa ka codeeya xaruntan, waxaanay codbixiyeyaasha
ugu baaqeen inay si nabadgalyo ah codka u dhiibaan,isla markaana u dul qaataan
kulaylka cadceedda iyo xidhiidhiga safafka dhaadheer.
Musharax C/raxmaan Cirro oo ka
sharaxan xisbiga mucaaradka ah ee WADANI oo ka hadlayey dareenkiisa doorasho
waxa uu yidhi “ waan hambalyeynayaa in ay dhiibtaan codkoodda, waxaan ku
faraxsanahay inaan ka qaybgalo codeynta oo aan codeeyo, waxaana rajaynayaa inay
si nabadgalyo ah u codeyno”
“doorashadan waxay kor uqaaday magaceenii oo
hoos u dhacay oo ay hoos u rideen xukuumada, guurtida iyo wakiiladda oo muddo
kordhin dhaafi waayey, marka doorashadani waxay inaga dhaqdhaqday magacaasi
inaga xumaaday,waxaanay jaraa’idka caalamku sheegeen inay tahay doorashaddii ugu
quruxda badnayd aduunkaa, waxaana dalka ku xukumi doona kitaabka alla, waxaanu
noqon doona dal lagu daydo, afarta musharax ee kale waan kaga haboonahay”ayuu
yidhi Musharax Faysal Cali Waraabe oo ka sharaxan xisbiga UCID.
Waxa isaguna markii uu codka
dhiibanayey dareenkiisa dhiibtay Musharax Muuse Biixi Cabdi oo ka sharaxan
xisbiga KULMIYE, waxaanu yidhi “ ilaahay baa mahad leh ina siiyey in doorasho iyo nabad ina wada
siiyey, doorasho khayr leh oo wanaag iyo horumar inoo keenta ayaan ka baryeyna,
dadka codeynayaa waan hambalyeynayaa dulqaadka iyo safafka dhaadheer ee ay ku
jiraan ee ay u samrayaan iyo ciidanka amniga ka shaqayanaya oo si fiicanu shaqaynaya iyo hawl-wadeenada
komishanka”
Doorashadan ayaa noqonaysa mid
casri ah oo ay adag tahay in musuqmaasuq ka dhaco ama cidi ku shuban karto,
waxaana goob kasta ka codeynaya shan boqol oo qof hadii ay ka badata waxa loo
kala jabinayaa laba qaybood, si safafka dhaadheer loo yareeyo.
Sidoo kale, dadweyanha codka
dhiibayaa ayaa galinkii horaba codadkooda dhiibtay, taas oo galinkii dambe dadku
yaraayeen, iyadoo goobaha qaarkoodba galinkii dambe la xidhay ka dib markii ay
dhamaadeen dadkii goobahan ka codaynayey ee ka diwaangashannaa.
Deegaanadda xeebaha sida gobolka
Saaxil ayaa dadku u samrayeen qoraxda iyo kulaylka xeebta ee jirta,taas oo
muujinaysay inay xiiseenayeen doorashadan oo ahayd mid xafiiltan iyo olole aad
u sareeya ka jiray, haseyeeshee dadku aad bay soo dhoweynayeen inay codeeyaan,
iyagoo dadkii oo kala afkaar ah ama xisbiyo kala duwan u codeynaya hadana safaf
ku wada jireen,waxaana maanta faanayey qofkii kaadhkaa codeynta haysta.
Dhinaca kale waxa doorashadan ka
soo qaybgallay illaa lixdan kormeerayaal caalami ah iyo lix boqol oo kormeere
oo ka socda ururadda bulshadda.
Barkhad-ladiif M. Cumar,
Hiiraan Online
[email protected]
Hargeysa, Somaliland.