Isniin, November, 13, 2017 (HOL) – Guud ahaan marka la eego deegaannada
Soomaaliland waxaa si habsami leh uga soconaya doorashada madaxweynaha oo
wali waxaa la arkayaa dadka oo safaf dhaadheer ku jira si ay codkooda u
dhiibtaan.
Waxaa ku tartamaya saddexda Xisbi ee kala ah Kulmiye, WADANI iyo UCID oo ay kala hogaamiyayaan saddexda
musharax madaxweyne Muuse Bixi, Carxmaan Cirro iyo Feysal Cali Waraabe.
Guddoomiyaha guddiga doorashada Soomaaliland C/qaadir Imaan Warsame ayaa tilmaamay in ilaa caawa fiidkii la soo xiro doono goobaha doorashada, laakiin
dhinaca kale waxaa uu sheegay in ay sii furnaan doonaan ilaa dadka safafka hadda ku jira ka
soo dhamaanayaan.
Qabsoomida doorashadan waxaa qeyb -weyn ka qaadanaya Ardeyda Jaamacadaha oo loo tababaray in ay
fududeeyaan geedi socodka doorashada iyo in dadku si dhaqse ah codadkooda u dhiibtaan
Madaxweynaha xilkiisu si dhamaanayo Axmed Maxamed Maxamuud Siilaanyo ayaa codkiisa ka dhiibtay xarunta Shaqaalaha Soomaaliland isaga oo u codeeyay
madaxweynihii badali lahaa.
Qeybo ka mid ah gobolka Sanaag oo lagu waday in ay ka
dhacdo codeynta doorashada, ayaa lagu soo warramayaa "in aysan u qabsoomin sidii la
qorsheeyay ka dib dibadbaxyo halkaas ka dhacay.
Wariyaha Hiiraan Online ee degmada Laascaanood Seynab Cabdi
Warsame ayaa sheegtay in gobolka Sool si wanaagsan doorahadu uga socto islamarkaana Amniga siweyn loo adkeeyay.
Wariyaha ayaa intaa darrtay in degmada Taleex oo laga
cabsi qabay in ay ka dhacaan rabashado wax dhibaato ah laga soo sheegin.
Guud ahaan marka leysku darro goobaha loogu talagalay in
codadka laga dhiibto ayaa gaaraya 1, 642 goob doorasho.
C/raxmaan Diini, Hiiraan Online
[email protected]
