NUUX TAANI “Waxaan ogahay in xadka Somaliland uu sugan yahay, cid ku soo xadgudbi kartaana ma jirto”
Axad, November 12, 2017 (HOL)- Taliyaha guud ee ciidamada
Militariga Somaliland Gen: Nuux Ismaaciil Taanni ayaa sheegay inuu xadka
Somaliland xidhan yahay,isla markaana aanay jirin dhibaato ka jirta dhinaca
Maamulka Puntland.
Nuux Taanni ayaa sheegay in aanay
wax khilaaf ahi ka jirin Somaliland iyo Puntland,isla markaana waxa uu ka digay
in hadii dhibaato ka dhaco xadka cid kale ka faa’iidan karto.
“Puntland jaar baanu nahay oo ma
doonayno in wax dhibaato ah naga dhex dhacdo, khilaafka labadda naga dhex
dhacaana waxa uu abuuri karaa inay dad kale ka faa’iidaystaan”ayuu yidhi Taliye
Nuux Taanni.
Waxa kale oo uu sheegay inuu
xadka Somaliland sugan yahay oo aanay jirin cabsi ka jirta iyo dhibaaato ka
dhici kartaa, waxaanu yidhi “ waxaan ogahay
in xadka Somaliland uu sugan yahay, cid ku soo xadgudbi kartaana ma jirto,
cidii ku soo xadgudubtay waa cid badheedhay maamulkaasi puntland kama filayno,
hadalka warbaahinta la marinayo iyo siday wax u jiraan way kala duwan yahay,
illaa hadda wax dhibaato ah oo weyn ma hayno.”
Hadalkan waxa uu jawaab u yahay
hadal ka soo yeedhay maamulka Puntland oo sheegay in aanay doorasho ka dhici Karin
goboladda Sool iyo Sanaag, taas oo sababtay in ciidamadii xadka joogay heegan
la galiyey si ay u ilaaliyaan in aanay dhibaato ka dhicin goobaha doorashaddu
ka dhacayso.
Dhinaca kale, Somaliland waxa loo
diyaar garoobay doorashada maalinta Barri ka dhici doonta, waxaana magaaladda
Hargeysa ilaa maanta ka baxayey dad faro badan oo ka soo codeynayey deegaanadii
ay kaadhadhka ka qaateen, isla markaana markasta oo doorasho dhacdo badi
dadweynuhu waxay dib ugu noqdaan deegaanadoodii oo ay ka soo codeeyaan, waxaana
gabi ahaanba la xidhayaa gaadiidka oo wax gaadiid ahi aanay Barri ka shaqayn
doonin magaaladda.
Barkhad-ladiif M. Cumar,
Hiiraan Online
[email protected]
Hargeysa, Somaliland.