Madaxweyne Farmaajo : Kuwa maanta na Mucaaradaya Afar sano ka hor sidan ayeey dowladnimada u diidanaayeen
Sabti, Novmeber, 11, 2017 (HOL) – Madaxweynaha dowladda
Soomaaliya Maxamed Cabdullaahi Farmaajo oo khudbad ka jeedinayay shirka wareega
nabad-galyada degmooyinka gobolka Banaadir ayaa markii ugu horeysay soo hadal
qaaday siyaasiyiinta iyo kooxaha ku kacsan dowladda uu madaxweynaha ka yahay.
Madaxweynaha ayaa sheegay wax yabaaha hadda dhaca ay soo
jiitamayeen tan iyo dowladdihii hore oo mar walba sida uu hadalka u dhigay
jireen shaqsiyaad mucaaradsan oo diidan in dowladnimadu socto oo waqti leysa-siiyo.
‘’Waxaan rabaa in aan idin sheego Arin sir ah wax yaabaha aad hadda
arkeysaan Afar sanno ka hor wey soo jirteen, dowladdii tan ka horeysay markii la
doortay iyada oo 6 bilood jirta ayaa leyla soo xiriiray oo leygu yiri
dowladda ayaa la mucaaradayaa ee ka soo qeybgalay, waxaan ugu jawaabay
dowladdan Lexbilood ayeey jirtaa'e maxaa lagu mucaaradayaa maa waqti la siiyo, kuwa maanta mucaaradaya dowladda qaarkood qeyb ayeey ka ahaayeen shaqsiyaadkii Afar sano ka hor xiriirka ila soo sameeyay ayuu yiri’’ madaxweyne Farmaajo.
Madaxweynaha ayaa sheegay in ay mar walba jiraan shaqsiyaad sidda uu hadalka
u dhigay caado ka dhigtay in aysan dalka ka hanaqaadin dowladnimo, waxaana uu
intaa ku daray in dowladdu aysan ogolaan doonin in bulshada la geliyo qal qal
siyaasadeed.
Hadalka Farmaajo ayaa imanaya xili dowladda uu madaxweynaha ka yahay
wajaheyso culeys siyaasadeed oo uga imanaya siyaasiyiin iyo shaqsiyaad
miis ku dhax leh siyaasada kuwaa oo waayadii ugu danbeeyay siweyn u
isticmaalayay baraha bulshada.
C/raxmaan Diini, Hiiraan Online
[email protected]
