Madaxweyne Farmaajo oo la kulmay Xildhibaannadii Galmudug ee xilka ka qaaday madaxweyne Xaaf
Jimco, November, 10, 2017 (HOL) – Yuusuf Axmed Ciyoow oo ka mid ah xildhibaannada baarlamaanka
Galmudug, islamarkaana guddoomiye u ahaa xildhibaannadii xilka ka qaaday
madaxweyne Axmed Ducaale Geelle Xaaf ayaa sheegay faah faahin dheeraad ah ka
bixiyay kulan uu la qaatay madaxweyne Maxamed Cabdullaahi Farmaajo.
Xildhibaan Ciyoow ayaa sheegay in madaxweynuhu uu kala hadlay xildhibaannada
xiisada ka taagan Galmudug iyo in arrimaha lagu dhameeyo dib-u-heshiisiin, hasse
ahaatee waxaan uu sheegay in ay ka soo horjeesteen dalabka madaxweynaha ee ah in
khilaafka siyaasadeed ee jira lagu xaliyo wadahadal.
‘’Annaga waan u sheegnay madaxweynaha dariiqa aan u marnay xil ka qaadista
iyo waxa jira oo dhan, wuxuu dalbaday in arinta lagu dhameeyo wadahadal iyo
heshiis, balse Annaga dhinaceena waxaan u sheegnay in wixii sharci ah aan
wadahadal marnaba laga galikarin ayuu yiri'' Xildhibaan Ciyoow.
Ciyoow ayaa intaa ku darray doodda xildhibaannada xilka ka qaaday madaxweyne
Xaaf uu aad u soo dhaweeyay madaxweyne Farmaajo kuna balameen in mar kale dib
leysugu soo laabto kulan kale.
‘’Waxaan leenahay Dastuurku qofna ma cafiyo, Xaaf si sharci ah ayaan
ku ridnay, taana wada hadal lagama galli karo ayuu hadalkiisa sii raaciyay
xildhibaan Yuusuf Axmed Ciyoow.
Madaxweynaha dowladda Soomaaliya Maxamed Cabdullaahi Farmaajo ayaa waayadii
ugu danbeeyayba ku howlanaa siddii loo dhameyn lahaa khilaafka u dhaxeeya mas’uuliyiinta
maamulka Galmudug, isaga oo horay kulan ula qaatay madaxweyne ku-xigeenka iyo
guddoomiyaha baarlamaanka Galmudug.
C/raxmaan Diini, Hiiraan Online
[email protected]