Culimadda Somaliland oo ku baaqay in ololaha si nadiif ah oo diinta iyo anshaxa suuban leh ka hor imanayn loo galo ololaha
Arbaco, November 01, 2017
(HOL)- Guddida Wanaag farista iyo Xumaan reebista ee Somaliland, ayaa baaq ku
aadan habsami u socodka ololaha doorashadda madaxtooyadda ee saddexda Xisbi ee
Kulmiye, UCID iyo Waddani ay ku hirdamayaan taladda dalka ugu baaqay in laga
dheeraado wax kasta oo amniga iyo dhaqanka Suuban ee Somaliland waxyeelaaya in
laga fogaado inta ay doorashaddu socoto.
Guddoomiyaha guddida wanaagfarista iyo Xumaan reebista ee Somaliland
Sheekh Cabdiraxmaan Maxamed Cabdalle iyo xubna kale ee guddida wanaag farista,
ayaa baaq ay ka soo saareen, ololaha doorashadda Madaxtooyadda Somaliland ee
saddexda xisbi Qaran ku tartamayaan oo meel xaasaasi ah maraaya, waxay kula
taliyeen murashaxiinta, madaxda, siyaasiyiinta iyo taageerayaasha saddexda
xisbi ee UCID, Waddani iyo Kulmiye inay ka dheeraadaan wax kasta oo hadalo
xanaf leh ama bulshadda kala keenaaya ama amniga Somaliland dhibaato u keenaaya
inay ka fogaadaan.
“Iyada oo guddiga wanaag
farista iyo xumaan reebista Somaliland maalmihii la soo dhaafay wecyi
galinaysay bulshada ku dhaqan Somaliland, taas oo ay ku wacyi-gelinaysay
ilaalinta nabad-gelyada iyo edaabta suuban, haddaba Madaxda sar sare ee Guddiga
Xumaan reebista iyo Wanaag farista iyo waliba xubnaha gudigaasi, waxa ay
farriin wada jir ah u dirayaan Shacbiga reer Somaliland, Musharraxiinta u
tartamaya Jagada Madaxweynaha iyo Guddiga Doorashooyinka Qaranka Somaliland, in
laga dheeraado waxyaabaha ka horimanaya diinta iyo dhaqanka Suuban inta lagu
gudo jiro ololaha doorashadda”ayaa lagu yidhi baaq ka soo baxay guddida wanaag
farista.
Waxa intaasi ay ku dartay guddidu “Ugu dambeyntii guddida wanaag
farista iyo xumaan reebista Somaliland waxay ilaahay uga baryayaan in
doorashadda madaxtinimadda ee Somaliland ay ku dhamaato nabadgelyo iyo amni”
Dhinaca kale, culimadda waaweyn ee Somaliland ayaa la kulmay saddexda
musharax ee saddexda xisbi, waxaanay ka codsadeen in kalmadaha dhiifta ah iyo
kalmadaha colaadaha abuuri kara la joojiyo,isla markaana waxay usoo jeediyeen
in gaadiidka hablaha iyo dumarka wada saaran ee baabuurta daaqadaha ka laalaada
la joojiyo,isla markaana goobaha fagaaraha la kala sooco rag iyo dumar,
waxaanay ciidanka amniga lagu amray inay gabi ahaanba ka ogolaan cid kasta oo
dhaqanka iyo diinta wax aanay ogolayn ku dhaqmaya in talaabo laga qaadin.
Barkhad-ladiif M. Cumar,
Hiiraan Online
[email protected]
Hargeysa, Somaliland.