U gurmadka xaalada caafimaad darro ee ka taagan Buuhoodle oo xiisad siyaasadeed abuurtay
Arbaco, May, 03, 2017 (HOL) - Xiisad siyaasadeed ayaa ka abuurantay magaalada Buuhoodle
iyadoo ay dadka degaankaasi la ildaran yihiin xaalad caafimaad darro.
Madaxweyne ku xigeenka Puntland Eng.
C/xakiin Xaaji Cumar Camey ayaa ku sugan magaalada Buuhoodle isagoo deegaano
badan safar ku maray oo ka tirsan gobolka Cayn oo xaalad caafimaad xumo ay ka
taagan tahay.
"Waxaan u soconey sidii aan
xog-ogaal ugu noqon lahayn dhibaatooyinka ka jira gobolka, si aan wax uga
qabano, wax qabadna waan samaynay hadana waxbaan qabanaynaa" sidaana waxaa
yidhi Camey isagoo ka hadlayey magaalada Dandan oo dhinaca bari uga beegan
Buuhoodle.
Madaxweyne Camey ayaa mashaariic badan dhagaxdhigay oo ay ka mid
yihiin Ceelal, Xarumo Caafimaad, Iskoolo iyo wado Buuhoodle dhexmarta oo Laami
ah, balse, waxaan u suuragelin in uu Booqdo dadka bukaanka ah ee ku sugan
Isbitaalka Daryeel oo uu leeyahay Wasiirka Caafimaadka Somaliland
Xaglatoosiye.
Dhinaca kale, wasiirka caafimaadka
Somaliland Saleebaan Ciise Xaglatoosiye ayaa maanta si weyn loogu soo dhoweeyey
Buuhoodle, iyadoo soo dhaweyntani u muuqatey mid xamaasadaysan, waxaana uu lug
ku maray wadada bartamaha magaalada
isagoo dadka kula hadlay meel fagaare ah.
"Safarkaygu maaha mid istustus
ku jiro ee waa mid wax qabad, dawlada Itoobiya gargaar ayay u soo fidisay dadka
shubanku asiibay waana u mahad celinaynaa, balse waxaan ka codsanaynaa in ay
naga daayaan dadka dhulkeeda soo maraya" ayuu yiri Xaglo isagoo u jeeda
Madaxweyne ku xigeenka Puntland,
Wasiirka ayaa sheegay in waxqabad
balaadhan ay wasaaradiisu ka geysatey xanuunka shubanka isagoo xusay in 13 tiim
ay haatan ka joogaan halka uu Puntland ku eedeeyey in markii la xakameeyey
xanuunkii ay soo yaaceen, waxaana xaglo uu marag gashanayey dadweynaha oo
jawaabo taageero u ah ugu muujinaayey.
Labada dhinaca taageerayaashooda
ayaa aad looga cabsi qabaa in ay isku dhac sameeyaan taasina ay sababto in isu
ciidansi aafo reebaa uu halkaas ka dhasho sida ay dad badani qabaan weliba
ciidamada Somaliland oo dhinacyo badan ka fadhiya oo uu u fudud yahay dhaqaaqu
halka Puntland ay soo dhex marto dhul Itoobiya maamusho.
Seynab A Warsame
[email protected]
Gobolka Sool