Ra’iisal wasaaraha oo daah furay kulan labo cisho ah oo lagu dardargalinayo howlaha xukuumada
Talaado, May, 02, 2017 (HOL) – Ra’iisul wasaaraha xukuumada federaalka
Soomaaliya Xassan Cali Kheyre ayaa maanta daah-furay kulan wadatashi (Retreat)
labo cisho ah oo ay xubnaha golaha wasiirada ku dar-dargelinayaan waxqabadka xukuumadda.
Ujeedada kulankan labada cisho ah oo ay wasiiradu ku gorfeynayaan
qorshe-howlleedka xukuumada ayaa ah sidii qorsheyaasha wasaaradaha ay u noqon
lahaayeen kuwo mideysan oo ka tarjumeysa barnaamijka xukuumadda.
Sidoo kale
ujeedada kulankan wadatashiga ah ayaa ah dhaqangelinta barnaamijyada isku xirka
bulshada iyo daawladda, loogana hadli doonaa sidii loo dhaqangelin lahaa dawlad
wanaag, isla xisaabtan, furfurnaan iyo u-adeegidda bulshada Soomaaliyeed.
Ra’iisal wasaaraha oo daahfuray kulankan wadatashiga ah ayaa ka hadlay
muhiimada wadatashiga oo uu sheegay in wasiirada looga fadhiyo inay u adeegaan
shacabka Soomaaliyeed. ra’iisul wasaaraha ayaa yiri “Xukuumaddu waa in ay
horumuud ka noqotaa dardargelinta waxqabadka dowladda si loo kordhiyo
kalsoonida shacabka oo muhiim u ah hirgelinta barnaamijka xukuumada. Anniga ka
ra’iisal wasaare ahaan waxaan diyaar u ahay inaan furumaha dagaalka tago oo aan
ciidamada geesiyaasha la wadaago daruufaha adag oo ay ku howlgalayaan, waxaana
diyaar u ahay in aan nafteyda ku waayo oo aan u huro difaaca shacabka.”
Kulankan wadatashiga ah ee labada cisho ayaa lagu lafagurayaa arrimaha ay
dowlada siisay mudnaanta sida ka hortaga abaaraha, soo celinta amniga iyo
nabadeynta, kobcinta dhaqaalaha, la dagaalanka musuqmaasuqa, gaarsiinta
doorashooyin hal cod iyo hal qof ah, dib-u-heshiisiinta, midnimada ummadda
Soomaaliyeed iyo xiriirka caalamiga ah.
Khubaro ku xeel dheer arrimaha mudnaanta leh ayaa jeedin doona casharo
wasiirada loogu sharaxayo xaalada dalka iyo sida loo gaari karo in waxqabad
dhab ah lala yimaado.
Sidoo kale, kulanka ayaa intii uu socday waxaa laga dhageystay cabashooyin
qaar kamid ah shacabka oo iyagu ku biiriniyey tallooyinkooda Xukuumadda, waxana
ay soo bandhigeen caqabadooyin kala duwan oo ay la kulmeen.
Kulanka ayaa noqonaya kii ugu horeeyay oo ay yeeshaan gollaha wasiirada
xukuumadihii isaga danbeeyay dalka, marka laga soo tago shirarka maalinlaha ee
todobaadkiiba mar ay yeeshaan gollaha.
C/raxmaan Diini, Hiiraan Online
[email protected]