Ahlu Sunna oo faah faahin ka bixisay sababihii fashilka wada hadaladii ay la lahayeen Galmudug
Talaado, May, 02, 2017 (HOL) – Madaxweynaha maamulka gobollada dhexe ee Ahlu
Sunna Waljameeca Sheekh Maxamed Shaakir Cali Xassan ayaa markii ugu horeysay
faah faahin dheeraad ah ka bixiyay sababaha fashilka wada hadaladii ay la
lahaayeen maamulka Galmudug.
Waxaa uu sheegay dhinacooda ay kulanka la tageen labo sharuuddood oo sida uu
hadalka u dhigay u cuntami waayay dhinaca dowlad gobolleedka Galmudug.
‘’Annaga waxaan dalbanay labo sharuuddood oo kala ah marka hore in leysku
daro labada baarlamaan iyo in marka leysku daro kadib la tago xarunta maamulka
gobollada dhexe ee Dhuusa-mareeb, halkaana laga cadeeyo in heshiis buuxa la
gaaray ayuu yiri ‘’ madaxweynaha maamulka gobollada dhexe.
Hasse ahaatee waxaa uu sheegay in ay soo baxday baqdin ay ka muujiyeen dhinaca
Galmudug qodobka ah in leysku daro labada baarlamaan oo haddii ay taa dhacdo is badal ka
ku keeni karta awood qeybsiga hogaanka sare ee maamulka Galmudug.
‘’Xubnihii ku matalayay wada hadalada dhinaca Galmudug ayaa si toos ah u sheegay in aysan aqbali
karin in labada baarlamaan leysku daro, waxa loo diidayna waxa weeye waxaa laga baqay
in aan aniga ku soo baxo kursiga madaxweynaha maamulka Galmudug ayuu yiri ‘’
Sheekh Max'ed Shaakir.
Inkastoo madaxweynaha maamulka gobollada dhexe ee Ahlu Sunna Waljameeca uu
sheegay in ay fashilmeen wada hadalladii ay la lahaayeen Galmudug, haddana
dhinaca kale war-saxaafadeed ka so baxay dowladda federaalka ayaa lagu sheegay
wada hadalada is afgarad laga gaaray laguna balamay in ay sii socdaan kaddib
doorashada madaxweynaha maamulka Galmudug ee loo balansan yahay maalinta beri
ah.
C/raxmaan Diini, Hiiraan Online
[email protected]