Khamiis, Maarso, 09, 2017 (HOL) - Ku
dhowaad toban ruux ayaa degaano kala duwan oo ka mid ah gobolka Sool ugu dhintay xanuuno la sheegay in ay sababeen abaaraha baahsan ee ka jira wadanka.
Dadka
dhintay oo ah caruur ayaa waxa ay dhamaantood ka mid yihiin dadka ku
nool goobaha ay ku noolyihiin dadka duuntadii ay haysteen ka dhamaadeen.
Sadex
qof ayaa la Xaqiijiyey in ay ku dhinteen magaalada Xalin oo ka mid ah
degmada Taleex, waxaana la sheegay in uu sababay shuban ku dhacay iyadoo
ay qaarkalena qarka u saaran yihiin in ay dhintaan.
"Xanuunada
hada haya dadka waxaa ugu daran Shuban, Oofwareen iyo Jadeeco, waxana
aan jirin wax daawo ah oo soo gaadha oo lagu badbaadinayo marka laga
reebo Bisha Cas, waxaase jira caruurta oo aan qaadan karin kiniinada in
ay adkaato sidii loo daryeeli lahaa" sidaana waxaa HOL u sheegay Dr.
Ckariin Axmed Goobe oo ku sugan degmada Taleex.
Degaanada
Ceel-Midgaan iyo Caga-Laaye oo ka mid ah degaanka Yagoori ee Waqooyiga
gobolka Sool ayaa afar ruux waxa ay u dhinteen xanuunka Jadeecada sida
uu Hiiraan u sheegay Eng. Maxamed Cabdi Jaamac Isuduwaha Hay'adda NERAD,
waxaanuna intaas ku daray in xanuuno aad u badan ay ka jiraan degaanada
barakacayaashu degan yihiin oo Shuban, Jadeeco Nafaqo daro iyo qaar
kaloo badan.
Sidoo
kale waxaa degaano ka mid ah bariga degmada Laascaanood la sheegay in
ay ku dhinteen laba ruux oo caruur ah kuwaas oo ku kala dintay Tukaraq
iyo Dhagxanyo-cado kuwaas oo sida uu noo sheegay Xidig Cali Xasan shuban
uu sababay.
Gudiyada
abaaraha ee Degmooynka Taleex, Xudun iyo Laascaanood ayaa waxa ay
sheegeen in si gooni gooni ah in ay maalinba maalinta ka danbaysa ay sii
kordhayaan dhibaatooyinka soo foodsaaraya dadka barakacayaasha ah,
waxaana ay xuseen in biyuhu ay yihiin kuwa ugu daran ee dadkan ugu daran
yihiin baahidooda.
Si
kataba ha ahaatee waxaa siweyn isha loogu hayaa dhibaatada adag ee soo
wajahdey dadka barakacayaasha ah, iyadoo ay jiraan xanuuno baahsan oo
guud ahaan gobolka soo wajahay, waxaanay ku soo beegmaysaa xili ay
wasiiro iyo xildhibaano ka socda Somaliland ay ku sugan yihiin magaalada
Laascaanood, balse aanay weli ka muuqan wax taakulo ah oo ay ka
dhawaajiyeen.
Seynab Cabdi Warsame
Laascaanood G. Sool