Khamiis,
Maarso, 09, 2017 (HOL) - Maalmihii ugu
danbeeyay magaalada Muqdisho waxaa siyaabo kala duwan loogu dilay mas’uuliyiin
ka tirsanaa dowladda, dad rayid iyo waxgarad
bulshada dhaxdeeda magac ku lahaa.
Kooxo ku hubeysan Bastoolado ayaa xalay xaafada Sanca degmada Yaaqshiid ee gobolka
Banaadir ku dilay Xasan Macalin
Taakow (Macalin Shabeelow) oo ahaa guddoomiyihii laanta Sahan waaxda
Heegan ee degmada Yaaqshiid.
Afhayeenka Maamulka Gobolka Banaadir C/fataax Cumar Xalane oo la hadlay warbaahinta ayaa sheegay in ciidamada ammaanka ay ku raadjoogaan raggii ka
dambeeyay dilkan, isagoo sidoo kale dilkan ku eedeeyay Al-shabaab.
Dhinaca kale xalay bartamaha deegaanka Ceelasha-Biyaha waxaa lagu toogtay mid
ka mid ha ergadii xildhibaanada baarlamaanka ku soo dooratay deegaannada
Galmudug, kaasi oo lagu magacaabi jiray C/laahi Kabaweyne.
Ugu danbeyntii, dilalkan oo todobaadyadii ugu danbeeyay siweyn ugu badnaa
caasimada ayaan la ogeyn kooxaha geysanaya marka laga soo tago eedeynta mas’uuliyiinta
dowladda oo dhamaan falalkan dhacaya ku sheegaya in ay ka danbeeyaan
Al-shabaab.
C/raxmaan
Diini, Hiiraan Online
[email protected]