Golaha Musdambeedka Abwaanadda Somaliland oo ka hadlay khilaafkii doorashooyinka ee ay ka odayeeyeen
Arbaco, Maarso ,08, 2017 (HOL)- -Golaha musdambeedka Abwaanadda
Somaliland oo maalmiyihii u dambeeyey ka odayeynayey khilaafyaddii ka dhashay
wakhtiga doorashooyinka iyo muddo kordhintaba ayaa sheegay in madaxdii ay la
kulmeen dhagaysteen taladoodii,isla markaana qaateen oo ay ku dhaqmeen
baaqyaddii ay usoo jeediyeen.
Ururkan Musdambeedka Abwaanadda
Somaliland ayaa sheegay in mudaddii ay isku xil qaameen in si wanaagsan oo
nabad ah ku dhamaato khilaafyadda ka jira arrimaha doorashooyinka ay iskaga
dabqaadeen guddida doorashooyinka, saddexda xisbi qaran, madaxweynaha iyo
shirgudoonka guurtiddaba, kuwaas oo ay xuseen inay si fiican ula qaateen
talooyinkiii ay usoo jeediyeen.
“Somaliland xaalado adag oo soo
foodsaartay waxay ku dabiibtay ilaahay baa mahad leh oo ay kaga bogsatay
daawadda ah talllo odayaal , wadatashi, iyo isku tanaasul, arrinta doorashada
Somaliland iyo khilaafkii ka yimid xiligii la qaban lahaa oo ku soo beegmay
xilli abaaro ay ka jiraan wadanka, kama duwana dhibaatooyinka bulshadda la soo
darista, anagoo halkaasi ka duulayna waxaanu ku dhawaaqnay 10.1,2017 kulan
saxaafadeed anagoo kaga hadlayna arrintaasi kuna baaqnay in la iskugu ymaado
gole la iskaga yimaado oo lagaga tashaddo arrintaasi si aanu uga midho dhalino
arrinkaasi,, waxaanu la kulanay guddida doorashooyinka, saddexda musharax ee
saddexda xisbina waxaanu iskugu keenay xarunta dhaqanka ee Hargeysa,halkaasi oo
la isku raacay in is afgarad iyo wada hadal lagu dhameeyo goorta doorashadda la
qaban doono iyo in laga waantoobo hadaladda xanafta leh ee la isku marinayo
warbaahinta”ayuu yidhi afhayeenka Golaha Musdambeedka Abwaanadda Maxamed Cali
Weji.
Sidoo kale, waxay golaha
Abwaanaddu sheegeen inay la kulmeen madaxweynaha, shirgudoonka Guurtidda iyo
masuuliyiin kale, oo dhamaantood u gudbiyeen talooyinkii lagu xalinayey khilaafyada
arrimaha doorashooyinka ee ay sababtay abaaraha ka jira wadanka.
“waxaana u mahad naqaynaa dhamaan
madaxdaasi aanu la kulanay qalbi wanaaga nagu soo dhoweyeen, ixitraamka iyo
dhagaysiga nagu qaabileen, talooyinka
aanu sidanayna nala wadaageen,waxaan ilaahay ugu mahadnaqayna is dirkii aanu is
dirnay in natiijo wanaagsan lagu gaadhay.”ayey war-muriyeedkooda ku
yidhaahdeen.
Waxa kale oo baaq ka soo saareen
in abaaraha jira loo gurmaddo iyo in sicir bararka jira dadka ay khuseeyaan wax
ka qabtaan,isla markaaana wakhtiga doorashadda loo qabtay laga hawlgalo in lagu
qabto doorasho wanaagsan oo dhibaato horseedin.
Barkhad-ladiif M.
Cumar, Hiiraan Online
[email protected]
Hargeysa, Somaliland.
