Arbaco, 08, 2017 (HOL) - Dadka weerarka
gaystay ayaa galay isbitaalka ugu wayn ee milatarigu ay ku leeyihiin magaalada
Kabul, waxaana wali socda weerar rasaas loo adeegsanayo, sida ay sheegtay
wasaaradda difaaca ee dalka Aghanistaan.
Afhayeen u hadlay wasaaradda ayaa
sheegay "in la weeraray isbitaalka Sardar Daud Khan".
Isbitaalkan oo leh 400 oo sariirood
wuxuu u dhaw yahay safaaradda Maraykanka.
Qof ka tirsan shaqaalaha Isbitaalka
ayaa wakaaladda wararka ee Reuters u sheegay in uu arkay nin hubaysan oo qaba
dharka dakhaatiirta oo la soo baxay qori isaga oo rasaas furay ka dibna dilay
labo ruux.
Ugu yaraan 13 ruux ayaa ku
dhaawacantay weerarka waxaana la geeyay isbitaallo kale, waxaa sidaas ku
warantay warbaahinta Tolo News television oo soo xiganaysa saraakiil ka tirsan
caafimaadka.
Qof ka mid ah shaqaalaha isbitaalka
ayaa Facebook ku soo qoray "dadkii weerarka soo qaaday isbitaalka
dhexdiisa ayay ku jiraan ee noo soo duceeya".
Qarax ayaa goor hore laga soo
sheegay isbitaalka.
Lix iyo toban ruux ayaa magaalada
Kabul ku dhintay labo todobaad ka hor ka dib labo qarax oo ay Taliban ka
gaysatay halkaas.
Waa mid ka mid ah weeraro is
xigxigay oo lagaga soo horjeedo xukuumadda Afghanistan iyadoo malayshiyaadku ay
soo cusboonaysiiyeen weerarada ay gaytaan.
Xogasho BBC
C/raxmaan Diini, Hiiraan Online
[email protected]
