Talaado, Maarso, 07, 2017 (HOL) -Madaxweynaha
Maamulka Khaatumo Prof. Cali Khaliif Galayr ayaa ka dayriyay xaaladda abaareed
ee ka jirta guud ahaan Gobolka Sool iyo Buuhoodle oo haatan maraysa halkii ugu
darneyd.
Prof. Galayr waxaa uu aad ugu
dheeraaday xaaladda Nololeed ee dadka reer guuraaga ah oo uu sheegay in
maalinba maalinta ka danbaysa ay soo kordayaan dadka caydhoobey ee ku soo
xeroonaya magaalooyinka.
"Aniga sheeko iyp shaahid kuma
maqal xiligan oo kale, waxaa la marayaa in xoolihii yaraa ee dadka u hadhay
haatan lagu masruufo galey oo sidii dadka Qado, Quraac iyo Casho la siiyo,
waxaana taasi muujinaysaa heerka ba'an ee ay abaartu marayso" ayuu yidhi
Galaydh,
Madaxweynaha maamulka Khaatumo oo shir saxaafadeed ku qabtay gurga uu ka degan yahay magaalada
Widhwidh oo haatan xarun u ah maamulkiisa ayaa waxa uu baaq u diray Jaaliyadaha
degaankaas, Beesha Caalamka, wadamada deriska ah, kuwa Carabta iyo cidkasta oo
gurmad samayn karta.
Dhinaca kale Porf Galayr waxaa uu fariin
dheer u diray beelo colaad guun noqotay ay ku dhex martay galbeedka
degmada Laascaanood, waxaanu ka codsaday in ay u hogaansamaan dadka iyo
culimada isku xilqaantay ee uu ka mid yahay buu yidhi Sheekh Cabdinaasir Xaaji
Axmed oo haatan wada qorshe ay go'aan kaga gaadhayaan xiisadan oo galaafatay
dad ku dhow 100 ruux.
Seynab Cabdi Warsame
[email protected]
Laascaanood G. Sool