Madaxweyne Farmaajo : Warbaahinta madaxabanaan waxaay ku soo shaqeysay daruuf aad u adag [Sawirro]
Axad, Maarso, 05, 2017 (HOL) – Madaxweynaha
dowladda Soomaaliya Maxamed Cabdullaahi (Farmaajo) ayaa xarunta madaxtooyada ku
qaabilay maamulka iyo tifaftirayaasha warbaahinta sida gaarka ah loo leeyahay
ee dalka iyo ururrada ay ku midaysanyihiin suxufiyiinta.
Madaxweynaha oo kulanka hadal ka
jeediyay ayaa sheegay in warbaahinta madaxabannaan ay ku soo shaqeeysay duruufo
aad u adag, isaga oo uga mahad celiyay sidii ay u garab istaageen xilligii uu
ahaa ra’iisul wasaaraha, oo ay xukuumaddiisa dagaal adag kula jirtay kooxda
argagixisada ah ee Al Shabaab .
Madaxweynaha ayaa tacsi u diray
eheladda iyo qaraabada saxafiyiintii Soomaaliyeed ee naftooda u waayey gudashada
waajibaadkooda shaqo.
Madaxweyne Farmaajo ayaa yiri “waxaa
xaqiiqo ah inaad dhibaatooyin badan la kulanteen si la idinka hor istaago inaad
bulshada u gudbisaan runta, masuuliyad iyo waajibaad idin saaran ayaa jira,
dowladdana masuuliyad iyo waajibaad saaran baa jira sidaad darteed waa inaan
iska kaashannaa sidii aan dalkeenna u nabadeyn lahayn.”
Ugu danbeyntii madaxweynaha ayaa u
ballan qaaday bahda saxaafadda in ay dowladdiisu diyaar u tahay in ay wada
shaqeyn buuxda la yeelato, waxa uuna ka codsaday in ay dhinacooda kaalin mug leh
ka qaataan wacyigelinta bulshada ee xagjirnimada, abaaraha iyo la dagaallanka
musuqmaasuqa.”
C/raxmaan Diini, Hiiraan Online
[email protected]
