Axad, Maarso, 05, 2017 (HOL) - Madaxweynaha dalka Turkiga Recep Tayyip
Erdoğan, ayaa ka hadlay xaaladda Abaaraha ee ka taagan gobolada dalka Somaliya,
xilli dadka iyo duunyada haraad iyo gaajo ay u geeriyoonayaan.
Qoraal uu soo dhigay Bartiisa
Twitter-ka Recep Tayyip Erdoğan, ayaa wuxuu ku sheegay in Somaliya xilligaan ay
ka jirto xaalad qatar ah oo dhanka abaaraha ah, marka la fiiriyo nolosha dadka
iyo duunyada sida ay tahay.
“Soomaaliya waxay qarka u saaran
tahay macluul iyo dhibaato Bini’aadanimo oo aad u xun xilligan, marka dowladda
Turkiga iyo shacabkeeda oo isku duuban gurmad ayay gaarsiin doonaan Somaliya.”
ayuu yiri Erdoğan.
Madaxweyne Recep Tayyip Erdoğan ayaa
sidoo kale sheegay in Hay’adda Bisha Cas ee Turkiga ay biloowday olole
ballaaran, oo dhaqaale loogu aruurinayo shacabka Somaliyed ee ku dhufatay
abaarta.
Xukuumadda Turkiga iyo shacabkeeda,
ayaa 2011 gurmad xooggan u samaysay Somaliya, oo xilligaasi ay ka jirtay
Macluul daran, oo galaafatay nolosha in ka badan 260,000 oo qof oo caruur iyo
haween u badnaa.
Turkiga ayaa saaxiib dhaw la ah
Somaliya, marka la eego dhanka Siyaasadda iyo arimaha Bulshada, waxaana la
xusuustaa kaalintii Turkiga uu ku lahaa u gar gaarida shacabka Somaliyed ee
dhibaatada abaaraha haysatay sanadkii 2011-kii.
C/raxmaan Diini, Hiiraan Online
[email protected]