Axad, Maarso, 05, 2017 (HOL) – Dowladda Kenya ayaa
sheegtay in ay ka feejigan tahay weeraro qorsheysan oo xarakada Al
Shabaab ay ka geystaan magaalooyinka Mombasa, Nairobi iyo sidoo kale saldhigyada
ay ku leedahay gobolka waqooyi Bari ee dalka Kenya.
Dowladda Kenya ayaa sheegtay in si weyn loo adkeeyay ammaanka xadka ay la
wadaagto dalka Soomaaliya , islamarkaana ciidamada ay wadaan howgallo lagu baadigoobaayo
dagaalyahanada ka tirsan Al-shabaab ee ku sugan gobolka Waqooyi Bari dalka
Kenya iyo sidoo kale xadka ay wadagaan labada dal.
Dowladda Kenya ayaa sheegtay in ay heshay xog ku aadan in Al-Shabaab ay
qorshanayaan weeraro ay ka geystaan dalka Kenya , gaar ahaan magaalooyinka
Mombasa iyo sidoo kale Mandera.
Taliyaha guud ee ciidanka difaaca dalka kenya ayaa warbaahinta u
sheegay in dowladda Kenya ay ku jirto feejignaan dheeri ah , islamarkaana
ciidankeeda ay diyaar u yihiin in ay Al-Shabaab ka ilaaliyaan in ay kasoo
gudbaan xadka wadaagaan labadal.
Taliyaha ayaa ugu baaqay ciidanka joogga saldhigyada dalka Kenya in ay
muujiyaan Feejignaan dheeri ah madaam ay suurta gal tahay in Xarakada
Al-Shabaab ay ku soo qaadaan weeraro gaadmo ah.
Ugu danbeyntii, waxaa uu sheegay in dowladda Kenya ay laba jibaartay
howgallada ay ka wado xadka Soomaaliya iyo Kenya ka dib markii ay kordheen
weerarada ay qaadayaan Al-Shabaab.
C/raxmaan Diini, Hiiraan Online
[email protected]
