Madaxweyne Cosoble : Xaafado ka tirsan Muqdisho ayaa hoostaga maamulka Hirshabeelle
Khamiis, Maarso, 30, 2017 (HOL) – Madaxweynaha dowlad gobolleedka
Hirshabeelle Cali Cabdullaahi Cosoble oo ka hadlay arimo la xiriira xuduudaha
iyo xadka uu maamulkiisa la wadaago gobolka Banaadir, ayaa sheegay in xaafado
ka tirsan magaalada Muqdisho ka tirsan yihiin maamulka Hirshabeelle.
‘’Xaafado ka tirsan Huriwaa iyo Kaaraan ayaa ka tirsan
maamulka Hirshabeelle, laakiin dadka degan hadda isku heystaan in ay toos u
hoostagaan gobolka Banaadir ayuu yiri madaxweynaha dowlad gobolleedka
Hirshabeelle Cali Cosoble.
Dhinaca kale, mar uu soo hadal qaaday garoonka diyaaradaha
Cisaley iyo dekeda Ceelmacaan ayuu sheegay in aysan shaki ku jiran in ay ka
tirsan yihiin maamulka Hirshabeelle, isaga oo ka digay in arintaa muran siyaasadeed la galiyo.
‘’In maanta la dhaho Cisaley iyo Ceelmacaan Xamar ayaa
laga xukumayaa waa arin kale, haddii ay taa dhacdo maamulka go’aan cad ayuu ka
qaadan doonaa’’ ayuu yiri madaxweynaha Hirshabeelle Cali Cabdullaahi Cosobole.
Ugu danbeyntii, arintan ku saabsan nidaamka federaalisam –ka iyo
xuduudaha ayaa u muuqda mid muran hor leh iyo khilaaf ka dhax abuuri kara
gobollada dalka oo laga yaabo in ay isku qabtaan maamulka deegaannada qaarkood
oo qolo walba dhinac u sheeganeyso.
C/raxmaan Diini, Hiiraan Online
[email protected]