Qofkii weerarka ka geystay dhismaha baarlamaanka Britain oo la sheegay in uu xiriir la lahaa Islaamiyiinta
Khamiis, Maarso, 23, 2017 (HOL) – Saraakiisha booliiska Britain ayaa sheegay in qofkii
weerarka ka geystay Arbacadii shalay dhismaha baarlamaanka UK uu xiriir la
lahaa kooxaha islaamiyiinta.
Sarkaal sare oo ka tirsan waaxda la dagaalanka argagixisada ayaa sheegay
inuu rumaysan yahay in ay garanayaan huwiyadda qofka weerrarka gaystay.
Shan qof ayaa dhimatay ugu yaraan 40 kalana waa ay ku dhaawacmeen kaddib
markii qofkaasi weerarka soo qaaday uu gaari marsiiyay dad marayay wadada
dhinaceeda, iyo markii dambana uu toorey askari boolis ah ka hor inta aanan la
toogan.
Askariga dhintay ayaa waxaa lagu magacaabay Keith Palmer, oo 48 jir xaasle
aabe ah.
Ra'iisul Wasaare Theresa May ayaa sheegtay in weerrarku uu ahaa mid
shaydaannimo ah oo lagu qaaday xorriyadda, dimuqraadiyadda iyo xorriyadda
hadalka.
Qofka weerrarka gaystay ayuusan boolisku weli magacaabin, taasoo muujineysa
in wali qofka aan la garan.
C/raxmaan Diini, Hiiraan Online
[email protected]
