Hargeysa : Macalin xarig ku muteystay in ay isku magac yihiin madaxweynaha Soomaaliland
Arbaco, Maarso ,22, 2017 (HOL)- Ciidamada booliiska Soomaaliland ayaa xabsiga u taxaabay Nin
ay isku magac noqdeen madaxweynaha Somaliland oo isna magaciisa la yidhaahdo
Axmed Maxamed Maxamuud Siilaanyo.
Muwaadinkan xariga ku muteystay in ay isku magac yihiin madaxweynaha
ayaa muddo laba cisho u xirnaa ciidamada nabad-galyadda wadooyinka, waxana lagu
haystaa in ay isku magac yihiin madaxweynaha Soomaaliland.
Maamulaha guud ee dugsiyadda
Nuuradiin oo uu macalin iyo maamule ku xigeen ka ahaa ayaa ka hadlay xadhiga
loo gaystay macalinkaasi oo ciidanka Nabadgalyadda wadooyinku shalay xabsiga u
taxaabeen.
“Macalin kaliya muu ahayn ee
maamule ku xigeenka dugsiyadda sare ee wiilasha ee dugsiga Nuuradiin ayuu ahaa
waxaa magaciisa la yidhaahda Axmed Maxamed Maxamuud Siilaanyo, waxaana magaca
Siilaanyo loo bixiyeey muddo dheer ka hor wakhtigii uu madaxweyne Siilaanyo uu
ahaa gudoomiyihii jabhaddii SNM ta, jacayl la jecel yahay Siilaanyo ayaa loogu
bixiyey markii saddexda magac ee hore isku eekaadeen ayaa naanaystan loo
bixiyey”ayuu yiri Mahdi Ibraahim oo ah maamulaha guud ee dugsiga NUURADIIN.
Waxaanu intaas ku daray “isagoo
iskuulka jooga ayaa loo yeeray waanu raacay ciidamada nabadgalyadda waxaanay ku
eedeeyeen inuu magaca madaxweynaha Foojar gareeyey, waxaanay ogaadeen markii uu
macalinka oo gaadhi watay ay ganaaxeen ka dibna uu u diray Zaad ayey ku arkeen
magacan oo u eeg kii madaxweynaha, sidaas ayaa loogu yeedhay, macalinka isagoo Da’yar
ayaa naanaystan Siilaanyo loo bixiyey”.
Dhinaca kale, taliyaha booliska
Somaliland C/laahi Fadal Iimaan oo isna dhankiisa laga waydiiyey xariga
macalinka ayaa sheegay in markii la xiray macalinkan uu markiiba bedelay
naanaystii uu ula baxay Siilaanyo oo uu u bedelay naanays kale oo ah Xaddi
taasina ay keentay sababta loo xiray.
“boolisku markii ay bilaabeen
inay wax ka waydiiyaan saddexdan magac iyo Naanaystiisa Siilaanyo ee madaxweynaha
iskaga mid ka yihiin markiiba wuu bedelay oo wuxuu sheegay in la yidhaahdo
Xadi, saacado gudahood ayuu magacii uu sheeganayey u bedelay, waxaana soo
baxday sheegasho magac aanu lahayn”ayuu yidhi Fadal taliyaha ciidanka Booliska.
Barkhad-ladiif M. Cumar,
Hiiraan Online
[email protected]
Hargeysa, Somaliland.